लसीसाठी "सेलिब्रिटी"ला बनवले फ्रंटलाईन वर्कर

 

 

ठाणे : एकीकडे कोरोना प्रतिबंधात्मक लसीचा तुटवडा जाणवत असून ठाणेकर नागरिकांना लस मिळणे मुश्कील झाले आहे. असे असताना, नोंदणी न करता नियम डावलून एका महिला सेलिब्रिटीने ठाण्यात लस घेतल्याचे उघड झाले आहे. ठाणे महापालिकेच्या पार्किंग प्लाझा रुग्णालयात ही लस देण्यात आली असून या अभिनेत्रीला ठेकेदाराने कोविड सेंटरची फ्रंटलाईन वर्कर म्हणून खोटे ओळखपत्र दिल्याचा धक्कादायक प्रकार उघडकीस आला आहे. त्यामुळे या सेलिब्रिटीला ही लस कोणी दिली? आणि कशी दिली? हा संशोधनाचा विषय असला तरी नियमबाह्य लस दिल्याने पालिका प्रशासन चांगलेच गोत्यात येणार आहेत.

 

 

 

गेल्या अनेक दिवसांपासून लसीचा तुठवडा जाणवत आहे. त्यातच जेष्ठ नागरिक आणि तरुणांना लसीपासून मुकावे लागत असताना काही ठिकाणी लसीकरणासाठी वेंटिंग करावे लागत आहे. मात्र मीरा चोप्रा या सेलिब्रिटीला थेट लस कशी देण्यात आली? असा सवाल आता विरोधक विचारत आहेत. तसेच चुकीच्या पध्दतीने ओळखपत्र बनवून देणाऱ्या संबधींत एजन्सीवर देखील कारवाई करण्यात यावी अशी मागणी भाजपने केली आहे.

 

 

 

नियमबाह्य लस घेतल्यानंतर ही मीरा चोप्रा यांनी लस घेतल्याचे फोटो सोशल मीडियावर पोस्ट केले आहेत. तसेच या फोटो बरोबर ओम साई आरोग्यकेअर प्रा. लि. कंपनीत सुपरवायझर म्हणून काम करीत असल्याचे बनवण्यात आलेले खोटे ओळखपत्र देखील पोस्ट करण्यात आले असून या ओळखपत्राचा क्रमांक ४२० आहे.तेव्हा नक्की कोण ४२० आहे याबाबत विरोधकांनी आश्चर्य व्यक्त केले आहे. तसेच नियमबाह्य लस देण्यात येणाऱ्याची चौकशी करून कारवाई करावी अशी मागणीही विरोधकांनी केली आहे.

 

 

 

ठाण्यात अनेक विद्यार्थ्यांना शिक्षणासाठी परदेशात जायचे आहे, त्यांना लसीसाठी प्रतीक्षा करावी लागत आहे. ठाणे महापालिकेला विद्यार्थ्यांची चिंता नसून एका सेलिब्रिटी लस देण्यात आली हे निंदनीय आहे. आतापर्यंत ठाण्याच्या लसीकरण केंद्रावर कुणा कुणाला नियमबाह्य लस देण्यात आली यांची समिती नेमून चौकशी करावी आणि संबंधितावर कारवाई करावी.

 

 

- मनोहर डुंबरे ( भाजप गटनेते )

 

 

 

सेलिब्रेटीला लस दिल्याबाबत माहिती घेऊ.तसेच संबधींत संस्थेकडून तिला ओळखपत्र कसे देण्यात आले, याचीही माहिती घेऊन पुढील कारवाई केली जाईल.

 

 

- गणेश देशमुख ; अतिरिक्त आयुक्त, ठामपा