बदलीमुळे नाराजी ! पोलीस अधिकाऱ्याचा आत्महत्येचा प्रयत्न

कोल्हापूर : वरिष्ठांकडून जाच होत असल्याचे प्रकरण राज्याच्या वन विभागात चर्चेत असतानाच वरिष्ठांकडून होणार्‍या जाचाला कंटाळून एका पोलीस अधिकार्‍याने आत्महत्येचा प्रयत्न केल्याचा खळबळजनक प्रकार समोर आला आहे. प्रदीप काळे असे संबंधित पोलीस अधिकार्‍याचे नाव असून त्यांनी समाजमाध्यमांवर याबाबतचा मजकूर प्रसारित करत वारणा नदीत उडी मारून आत्महत्येचा प्रयत्न केल्याची माहिती आहे. या घटनेनंतर पोलीस दलासह संपूर्ण राज्यात मोठी खळबळ उडाली आहे. सदर घटनेची नोंद करण्यात आली असून याबाबत अधिक तपास रात्री उशिरापर्यंत सुरु होता.

पोलीस निरीक्षक प्रदीप काळे हे कोल्हापूर जिल्ह्यातील पेठवडगाव पोलीस ठाण्याचे निरीक्षक म्हणून काम करत होते. तीन महिन्यांपूर्वी कर्तव्यात कसूर केल्याचा ठपका ठेवत त्यांची तडकाफडकी बदली करण्यात आली. उजळाईवाडी विमानतळावर सुरक्षा अधिकारी म्हणून त्यांची नियुक्ती झाल्यापासून ते मानसिक तणावात होते. आपण आत्महत्या करत असल्याचा मजकूर त्यांनी अधिकार्‍यांच्या ‘व्हॉट्सअ‍ॅप ग्रुप’वर टाकला. तो मजकूर पाहताच तातडीने सर्वांनी त्यांचा शोध सुरू केला. पण, त्यांनी मोबाईल ‘स्वीच ऑफ’ केल्याने शोध घेण्यात अडचण येऊ लागली. पोलिसांनी काळे यांच्या मोबाईल ‘लोकेशन’ची माहिती घेतल्यानंतर, ते वारणा नदीच्या काठावर असल्याचे लक्षात आले. त्यानुसार पोलिसांनी तिकडे धाव घेतली. त्यांनी वारणा नदीत उडी मारल्यानंतर तेथे असलेल्या काहींनी त्यांना वाचवले. मात्र, ते बेशुद्धावस्थेत होते.

पोलिसांनी त्यांना प्रथम कसबा बावडा येथील सेवा दवाखान्यात दाखल केले. नंतर एका खासगी रुग्णालयात त्यांना हलविण्यात आले. त्यांनी झोपेच्या गोळ्यांचे अतिसेवन केल्याचे वैद्यकीय अहवालात स्पष्ट झाले आहे. या घटनेने पोलीस दल हादरले आहे. काळे अजूनही बेशुद्ध अवस्थेत असल्याने त्यांचा जबाब घेता आला नाही. दरम्यान, वरिष्ठांच्या त्रासाला कंटाळून आपण आत्महत्या करत असल्याचे काळे यांनी ‘व्हॉट्सअ‍ॅप’वर पाठवलेल्या संदेशामध्ये म्हटले आहे.दरम्यान, फेब्रुवारीत नवी मुंबईत ‘एपीएमसी’ पोलीस ठाण्यात साहाय्यक पोलीस निरीक्षक भूषण पवार यांनीही स्वतःवर गोळ्या झाडून आत्महत्या केली होती. डिसेंबर २०२०मध्ये अशाच प्रकारची एक घटना तुळींज पोलीस ठाण्यात घडली होती. तेथील ‘कॉन्स्टेबल’ने स्वतःवर गोळ्या झाडून आत्महत्या केली होती. त्यानंतर आता पुन्हा एकदा पोलीस अधिका़र्‍याने नदीत उडी घेऊन आत्महत्येचा प्रयत्न केल्याने पोलीस दलात प्रचंड खळबळ उडाली आहे.