उद्यमजगतातील बाबासाहेबांची प्रेरणा

ही सगळी डॉ. बाबासाहेबांची पुण्याई. या पुण्याईमुळेच उद्योग-व्यवसाय क्षेत्रात यश संपादन करणार्‍या उद्योजक आणि उद्योजिकांच्या कर्तृत्वाचा आलेखही असाच देदीप्यमान आहे. हे कर्तृत्ववान उद्योजक आणि उद्योजिका म्हणजे डॉ. बाबासाहेब आंबेडकरांच्या विचारांना अभिप्रेत असलेला आत्मविश्वास आणि यश होय. त्यामुळेच बाबासाहेबांच्या महापरिनिर्वाणदिनानिमित्त दै. ‘मुंबई तरुण भारत’ यावर्षी उद्योजक बंधु-भगिनींच्या कर्तृत्वाला समर्पित ‘बाबासाहेबांची उद्यमप्रेरणा’ या विशेषांकाचे प्रकाशन करीत आहे. मी ‘प्रथम भारतीय’ आणि ‘अंतिमही भारतीय’ असे म्हणणार्‍या बाबासाहेबांनी देशाच्या एकात्मतेसाठी सर्वोच्च योगदान दिले. संविधानरूपी ऐक्याचे अमृत आपल्या देशाला दिले. कायद्याचा अर्थ लावताना देशातील शोषित-वंचित घटकांच्या विकासाचा आणि उन्नतीचा मार्ग मोकळा केला.

गुणानुसार आणि आपल्या आवडीनुसार व्यक्ती अर्थार्जन करू लागल्या आहेत. या अर्थार्जनासाठी कोणतीही जातीय चौकट नाही. आपल्या महाराष्ट्रात तर असे साधारण म्हटले जाते की, मराठी माणूस ना? व्यवसाय-उद्योग हा काही त्याचा पिंड नाही. मात्र, डॉ. बाबासाहेब आंबेडकरांच्या विचारांनी प्रेरित होऊन आज समाजात विविध व्यवसाय-उद्योगांमध्ये सचोटीने आणि प्रामाणिकपणे यश मिळवणारे अनेक उद्योजक आहेत. त्यांच्या उद्योगाची आणि समर्थ स्वावलंबनाची प्रेरणा केवळ बाबासाहेबांचे विचारच आहेत. जातीय समीकरणापलीकडे जाऊन केवळ आणि केवळ डॉ. बाबासाहेबांच्या प्रेरणेने उद्योग-व्यवसायात स्वत:चा ठसा उमटवणार्‍या या सर्व भीमनिष्ठ उद्योजकांस मानाचा जय भीम...