पुणे जिल्ह्यातील ३१७ ग्रामपंचायतींच्या पोटनिवडणुकीचा कार्यक्रम जाहीर

पुणे : पुणे जिल्ह्यातील ३१७ ग्रामपंचायतीमधील ५०३ रिक्त सदस्य पदांच्या पोटनिवडणूकीचा कार्यक्रम जाहीर झाला असून ;त्यापैकी पिंपरी चिंचवड पोलीस आयुक्तालय कार्यक्षेत्रातील २७ ग्रामपंचायतींची पोटनिवडणूक जाहीर झाली आहे. या निवडणूकीची आचारसंहिता २७ डिसेंबर २०२१ पर्यंत लागू असणार आहे. पुणे जिल्ह्यातील ३१७ ग्रामपंचायतींचा पोटनिवडणुकीच्या कार्यक्रम जाहीर झाला असून त्यातील पिंपरी चिंचवड पोलीस आयुक्तालय कार्यक्षेत्रातील २७ ग्रामपंचायतींची पोटनिवडणूक सुद्धा जाहीर झाली आहे. या पोटनिवडणूक होणाऱ्या ग्रामपंचायत कार्यक्षेत्रात पिंपरी चिंचवड पोलिसांतर्फे फौजदारी दंड प्रक्रिया संहिता १९७३ चे कलम १४४ अन्वये निर्बंध लागू करण्यात आले आहे.

पोटनिवडणूक सुरळीत, शांततेत व निर्भय वातावरणात पार पाडण्यासाठी तसेच कायदा सुव्यवस्थेचा प्रश्न निर्माण होवू नये, म्हणून मतमोजणी प्रक्रिया पूर्ण होईपर्यंत हे निर्बंध लागू असणार आहेत. खबरदारीचा उपाय म्हणून पिंपरी-चिंचवड पोलिसांतर्फे त्यांच्या कार्यक्षेत्रात येणाऱ्या २७ ग्रामपंचायतींमध्ये कलम १४४ लागू केले आहे. पुणे जिल्ह्यातील ३१७ ग्रामपंचायतीमधील ५०३ रिक्त सदस्य पदांच्या पोटनिवडणूकीचा कार्यक्रम आज जाहीर झाला आहे. त्यापैकी पिंपरी चिंचवड पोलीस आयुक्तालय कार्यक्षेत्रातील २७ ग्रामपंचायतींची पोटनिवडणूक जाहीर झाली आहे. या निवडणूकीची आचारसंहिता २७ डिसेंबर २०२१ पर्यंत लागू राहणार आहे. २१ डिसेंबर रोजी मतदान होणार असून २२ डिसेंबरला मतमोजणी होणार आहे. त्यामुळे मतमोजणी व निकाल अंतिमरित्या जाहीर करण्याच्या तारखेपर्यंत कलम १४४ लागू करण्यात आले असल्याची माहिती पिंपरी चिंचवड पोलिसांतर्फे आज देण्यात आली. पिंपरी-चिंचवड पोलिसांतर्फे लागू करण्यात आलेल्या निर्बंधांमध्ये पुढील प्रमाणे नियम असतील :- आचारसंहिता कालावधीत शासकीय, निमशासकीय, सार्वजनिक मालमत्तेची प्रत्यक्ष- अप्रत्यक्ष स्वरूपात विद्रुपता करणे हा गुन्हा मानण्यात येईल.

सार्वजनिक ठिकाणी संबंधीत पक्षांची चित्रे, चिन्हांचे कापडी फलके, सार्वजनिक ठिकाणी भाषण करण्यास निर्बंध लावण्यात आले आहेत.पोटनिवडणूक कालावधीत सर्व शासकीय कार्यालये व विश्रामगृह याठिकाणी मिरवणूक, मोर्चा तसेच घोषणा यांना बंदी असेल.शासकीय कार्यालयात वाद्य वाजविणे व गाणी म्हणणे आदी कोणत्याही प्रकारचा निवडणूक प्रचार करणे यांना बंदी घालण्यात आली आहे.

पोटनिवडणूकीच्या प्रचारादरम्यान कोणत्याही वाहनांच्या ताफ्यामध्ये ५ पेक्षा जास्त मोटारगाड्या अथवा वाहने वापरण्यास निर्बंध असतील. कोणतीही व्यक्ती, संस्था, पक्ष कार्यकर्ते यांना ध्वनीक्षेपकाचा (लाऊंड स्पीकरचा) वापर सक्षम पोलीस अधिकाऱ्याच्या परवानगीशिवाय करता येणार नाही. फिरते वाहन रस्त्यावरून धावत असताना ध्वनीक्षेपकाचा वापर करू नये. ध्वनीक्षेपकाचा वापर कोणत्याही प्रकारे सकाळी ६ पूर्वी व रात्री १० वाजल्यानंतर करता येणार नाही.पोटनिवडणूक कालावधीत सर्व धार्मिक स्थळे, रुग्णालये किंवा शैक्षणिक संस्था व सार्वजनिक ठिकाणांच्या जवळपास तात्पुरती पक्ष कार्यालये स्थापित करण्यास मनाई करण्यात आली आहे . या आदेशाचे उल्लंघन करणारी व्यक्ती भारतीय दंड विधान कायदा कलम १८८ अन्वये शिक्षेस पात्र राहणार असल्याची माहिती पिंपरी चिंचवड पोलिस आयुक्त कृष्ण प्रकाश यांनी दिली आहे.तसेच महाराष्ट्र पोलीस अधिनियम १९५१ च्या कलम ३६ प्रमाणे पिंपरी चिंचवड पोलीस आयुक्तालयाच्या हद्दीतील पोटनिवडणूक होणाऱ्या ग्रामपंचायत कार्यक्षेत्रातील सर्व पोलीस ठाणे, चौकी स्वाधीन अधिकारी यांना लेखी अगर तोंडी आदेश देण्याचे अधिकार प्रदान करण्यात आले आहेत.