जैसे ज्याचे कर्म : तालिबान

 

असो, थोडक्यात, तालिबान्यांनी अफगाणिस्तानमध्ये सत्ता हस्तगत केली म्हणून हर्षवायू झालेला गट जगभरात होता आणि भारतातही होता. याच पार्श्वभूमीवर तालिबान्यांच्या सत्तेमुळे जगभरावर दुष्परिणाम होतील, या चिंतेत असलेले लोकही बहुसंख्य होते आणि आहेत. या सगळ्या तर्कवितर्कांच्या गदारोळात मात्र तालिबान्यांचे दिवसच बदललेले दिसतात. ‘चोराच्या घरी चोरी व्हावी’ तसे ‘तालिबानी सत्तेत.’ आता म्हणे अफगाणिस्तानमध्ये दुसर्‍या कोणी दहशतवादी संघटना क्रूर हल्ले करत आहेत. ‘आमच्या देशात दहशतवादी बॉम्बस्फोट करतात,’ असे अफगाणचे तालिबान सरकार जगाला ओरडून सांगत आहे.

आजपर्यंत तालिबान्यांनी दहशतच पसरवली. हल्ले, अपहरण, बॉम्बस्फोट यातच त्यांची खुनी कारकिर्द रंगलेली. या अशा तालिबान्यांनी ‘कुणीतरी दहशतवादी हल्ला करत आहे,’ असे म्हणून भीती दर्शवणे हे पाहून वाटते ‘जैसे ज्याचे कर्म तैसे...’ तालिबानी सत्तेत आल्यानंतर अफगाणिस्तानमध्ये सतत बॉम्बस्फोटाची मालिका सुरू आहे. काही दिवसांपासूनचा आढावा घेऊ. आठ दिवसांपूर्वी अफगाणिस्तानमध्ये एका मशिदीत बॉम्बस्फोट झाला आणि १५ जण मृत्युमुखी पडले. चार दिवसांपूर्वी एका चौकात बॉम्बस्फोट झाला आणि चार बालके मृत्युमुखी पडली. दि. २५ नोव्हेंबरलाही अफगाणिस्तानच्या राजधानीमध्ये काबूलमध्ये बॉम्बस्फोट झाला. शेकडो वाहने उद्ध्वस्त झाली. गेले कित्येक महिने या बॉम्बहल्ल्यांनी अफगाणिस्तान हादरून गेले आहे. हल्ल्यांची जबाबदारी काही दहशतवादी संघटनांनी घेतली आहे. तालिबान्यांच्या राजसत्तेला हादरवू पाहणार्‍या या अतिरेकी संघटनांचे उद्दिष्ट काय असेल? तर याचे कारण चोराच्या वाटा चोरालाच माहिती! तालिबान्यांचे अंतर्गत स्वरूप त्यांच्या दहशतीचे मार्ग वगैरे याची चांगलीच माहिती इतर दहशतवादी संघटनांना आहे. तालिबानी जर राजसत्ता उपभोगू शकतात, तर आपण का नाही, असे या दहशतवादी संघटनांना वाटत असावे. त्यातच अफगाणिस्तानमधील इस्लामच्या अंतर्गत विभागलेले वांशिक-पंथ गटही आक्रमक झाले आहेत. प्रत्येकाला आपले वर्चस्व सिद्ध करायचे आहे. या सगळ्या साठमारीमध्ये अफगाणी जनता खर्‍या अर्थाने भिकेला लागून रस्त्यावर आली आहे.