ही मुंबईच तुम्हाला बुडवेल!

मुंबईची एका रात्रीच्या पावसात ‘तुंबई’ का होते, याची कारणं एव्हाना मुंबईकरांनीही अगदी तोंडपाठ झालेली. त्यामुळे एक-दोन तासांहून अधिक वेळ मुसळधार पाऊस कोसळायला लागला की, आपसुकच मुंबईकरांच्या छातीत धस्स व्हायचे. पण, हे इतके अंगवळणी पडले की आता त्याचेही अप्रुप नाहीच. ‘नेमेचि येतो पावसाळा आणि नेमेचि बुडते मुंबई’ अशी स्थिती. मुर्दाड मुंबई पालिका प्रशासनाच्या इतक्या वर्षांच्या गैरकारभारानंतर आता पावसाळ्यात मुंबई दोनदा-तीनदा तरी जलमय होणार, हे जणू विधिलिखित सत्यच मुंबईकरांनी मुकाट्याने स्वीकारलेले. नवीन पम्पिंग स्टेशन्स झालीत, प्लास्टिकबंदीही आली, नालेसफाई, रुंदीकरण, अनधिकृत बांधकाम हटविणे सगळे सगळे उपाय पालिकेच्या म्हणण्यानुसार झाले, तरी या परिस्थितीत तसूभरही फरक पडलेला नाही. मग दोष माथी मारायचा तो नऊ किमी उंचीच्या ढगांपासून ते अंदाधुंद बरसणार्‍या पावसावर आणि आपल्या प्रयत्नांना निसर्गाची साथ नाही, म्हणून खडे फोडायचे, हाच वार्षिक कार्यक्रम. अशा या सत्ताधार्‍यांनी स्वत:इतकेच मुंबईच्या पावसालाही देशात बदनाम करुन टाकले. पण, खरं सांगायचं तर मुंबईला बुडवणारा हा पाऊस नाहीच. या मुंबईला वारंवार बुडवले ते पालिकेतील सत्ताधार्‍यांनी. नियोजनशून्य कारभार आणि भ्रष्टाचाराची खोलवर पसरलेली कीड, यामुळे मुंबईचे 30 हजार कोटींहून अधिकचे बजेट असूनही त्याचा उपयोग मात्र शून्यच. जे पैसे खर्ची घातले तेही तात्पुरत्या उपाययोजनांवर, पण सत्ताधार्‍यांनी या समस्येवर कधीही कायमस्वरुपी उपाय का योजले नाहीत? देशविदेशातील तज्ज्ञांना सोबत घेऊन ही वेळ मुंबईवर दरवर्षी का ओढवते, नेमकी समस्या तरी काय, हे सत्ताधार्‍यांनी जाणून घेण्याचा किमान प्रयत्न तरी केला का? मुंबई बुडणार नाही म्हणून जे जे उपाय केले, त्याचा आजवर फायदा झाला का, याचा आढावा घेतला का? तर नाही. म्हणूनच मुंबई जलमय होऊन ठप्प होणे हा निसर्गाचा प्रकोप नाही, तर सत्ताधार्‍यांचा निकोप कारभारच याला सर्वस्वी जबाबदार आहे. दरवर्षी मुंबईला पुरात बुडवून पुन्हा वर काढण्याचा हा खेळ तोपर्यंत थांबणार नाही, जोपर्यंत पालिकेत सुशासन स्थापित होत नाही. तेव्हा, ज्यांनी आजवर मुंबईला वारंवार बुडवले, त्यांनाच जोपर्यंत मुंबईकर मतपेटीतून नाकारत बुडवत नाहीत, तोपर्यंत मुंबईची ‘तुंबई’ ही ओळख पुसली जाणार नाही.