जागतिक व्यासपीठावरील भारताचा बुलंद आवाज होत्या त्या...

नवी दिल्ली : मोदी सरकारच्या पहिल्या कार्यकाळात परराष्ट्र मंत्री विराजमान झालेल्या भाजपा नेत्या दिवंगत सुषमा स्वराज यांचे  प्रथम स्मृतीदिनी आज संपूर्ण देश स्मरण करत आहे. त्यांचे पती कौशल स्वराज आणि मुलगी बासरी स्वराज यांनी ट्विटरवर त्यांच्या आठवणीत भावुक होत भावनिक संदेश लिहिले. उपराष्ट्रपती व्यंकय्या नायडू, पंतप्रधान नरेंद्र मोदी आणि सय्यद अकबरुद्दीन यांच्यासह भाजप नेत्यांनी भावूक संदेश लिहिले.

उपराष्ट्रपती नायडू यांनी लिहिले की, 'आज तुम्हाला स्वर्गवासी होऊन एक वर्ष झाले आहे हे सत्य स्वीकारण्यास असमर्थ आहे. त्या माझ्या प्रिय बहीण होत्या, ज्या दरवर्षी रक्षाबंधनाला माझ्याकडे राखी बांधण्यासाठी आमच्या घरी येत. आम्ही सर्वांनी सुषमा यांचे भाषिक कौशल्य व भाषणांचे कौतुक केले. भाषेची शुद्धता, शब्दांची निवड, प्रामाणिकपणा, अकाट्य तर्कशास्त्र आणि तथ्ये यामुळे त्या एक लोकप्रिय वक्त्या बनल्या."

ते पुढे म्हणाले, 'सुषमाजींची हिंदी सर्व ऐकत व समजून घेत. त्याच्या शब्दांची निवड बर्‍याचदा शुद्ध असत, तरीही त्यांचे भाषण इतके गुळगुळीत आणि साधे दिसत होते की श्रोते मंत्रमुग्ध होऊन ऐकत असत. त्यांचा संस्कृतकडे अधिक कल होता, त्या शपथदेखील संस्कृत भाषेतूनच घेत. हरियाणातील रहिवासी असल्याने त्यांच्यावर हरियाणवी हिंदीवर प्रभुत्व असणे स्वाभाविकच होते, परंतु कर्नाटकात निवडणूक लढवताना कन्नड भाषेतील त्यांच्या अस्खलित भाषणामुळे त्यांना खरोखरच बहुभाषिक केले.'

पंतप्रधान नरेंद्र मोदींनी सुषमा स्वराज यांची आठवण म्हणून लिहिले की, 'सुषमाजींचे त्यांच्या पहिल्या पुण्यतिथीनिमित्त मी स्मरण करीत आहे. त्यांच्या अकाली व दुर्दैवी निधनाने बरेच लोक दु: खी झाले आहेत. त्यांनी नि: स्वार्थपणे भारताची सेवा केली. त्यांच्या रूपात जागतिक व्यासपीठावर भारताचा आवाज बुलंद होता. हेच मी त्यांच्या प्रार्थना सभेतदेखील बोललो होतो."

स्वराज यांची कन्या बांसुरी यांनी लिहिले, 'या देवी सर्वभूतेषु शक्तिरूपेण संस्थिता, या देवी सर्वभूतेषु मात्री रूपेण संस्थिता, नमस्तस्यै नमस्तस्यै नमस्तस्यै नमो नमः।। आई तू नेहमीच माझी शक्ती म्हणून माझ्याबरोबर आहेस. हे कृष्णा माझ्या आईची काळजी घे!'

महाराष्ट्रातील भाजप नेत्यांनी देखील सुषमा स्वराज यांचे स्मरण केले. विरोधीपक्षनेते देवेंद्र फडणवीस यांनी स्वराज यांचे स्मरण करत एक व्हिडिओ शेअर केला. त्यात ते म्हणाले, भारतीय जनता पार्टीच्या ज्येष्ठ नेत्या, ओजस्वी वक्ता, आमचे प्रेरणास्थान स्व. सुषमा स्वराजजी यांना प्रथम स्मृतिदिनी विनम्र अभिवादन." त्याचप्रमाणे, भाजप प्रदेशाध्यक्ष चंद्रकांतदादा पाटील यांनीही ट्विट करत स्व.सुषमा स्वराज यांचे स्मरण केले. ते म्हणतात, "सकारात्मक विचार आणि जनतेबद्दल असलेल्या भावनेच्या प्रति त्या राष्ट्र सेवेसाठी सदैव समर्पित राहिल्या. त्यांच्या मंत्रमुग्ध करणाऱ्या ओजस्वी वाणीला आणि त्यांच्या भाषाप्रभुत्वाला कोणीही विसरू शकत नाही. स्व. सुषमा ताईंना विनम्र आदरांजली."