श्रीराममंदिर भूमिपूजनाची उत्कंठा शिगेला ; अयोध्येत आज दीपोत्सव

अयोध्या : उद्या अयोध्येत होणाऱ्या राममंदिर भूमिपूजनाचा जल्लोष संपूर्ण देशभरात अनुभवायला मिळतो आहे. मुख्यमंत्री योगींच्या आवाहनावरून मथुरा, काशी, चित्रकूट, प्रयागराज, नैमिषारण्य आणि गोरखपूर या तीर्थक्षेत्रांमध्ये आजपासून अखंड कीर्तन आणि रामायण पठण सुरू झाले आहे. आज अयोध्येत दिवाळी साजरी करण्यात येणार आहे.

शरयू नदीदेखील नेहमीच्या प्रवाहापेक्षा अधिक ७० सेमी वर प्रवाही आहे. अशीच उत्सुकता आज अयोध्येमधील लोकांमध्ये भूमिपूजनाविषयी आहे. रामनामाची धून गात आज घरोघरी प्रभू श्रीरामांना अभिवादन केले जात आहे. संपूर्ण अयोध्यानगरी भूमिपूजनाच्या शुभ मुहूर्तामध्ये सामील होण्यास सज्ज आहे. कोरोनामुळे लोकांना या कार्यक्रमात प्रत्यक्ष सहभागी होता येणार नाहीये, परंतु घराच्या अंगणात रांगोळी आणि छतावर भगवा ध्वज लावून नागरिक या सोहळ्यात सहभाग नोंदवित आहेत.श्रीराम जन्मस्थळापासून २-४ किलोमीटर अंतरावर राहणा-या लोकांनी टीव्हीद्वारे महोत्सवात सामील होण्याची योजनादेखील बनविली आहे. ५ ऑगस्टचा दिवस जसजसा जवळ येत आहे तसतसे उत्साहवर्धक वातावरणात अयोध्येतील मंदिरे गजबजू लागली आहेत. संपूर्ण अयोध्यामध्ये भूमिपूजनाच्या दिवशी ५५ हजार किलो देशी तूपापासून बनवलेल्या १४ लाख लाडूंचे वाटप करण्याची योजना आहे.