मुख्यमंत्री कोविड सहायता निधीत ५४१ कोटी रुपये जमा; खर्च मात्र १३२ कोटीच!

मुंबई : महाराष्ट्राच्या मुख्यमंत्री सहायता निधी कोविड-१९ खात्यात देणगीदारांच्या मदतीने ५४१.१८ कोटी रुपये जमा करण्यात आले असताना प्रत्यक्षात फक्त १३२.२५ कोटी रुपये खर्च केल्याची माहिती आरटीआय कार्यकर्ते अनिल गलगली यांना मुख्यमंत्री सहायता निधी कक्षाने दिली आहे. एकूण जमा झालेल्या रक्कमेच्या २४.४३ टक्के निधी मुख्यमंत्री उद्धव ठाकरे यांनी खर्च केला असून, ७५.५७ टक्के रक्कम अशीच शिल्लक आहे.

माहिती अधिकार कार्यकर्ते अनिल गलगली यांनी मुख्यमंत्री सहायता निधी कोविड-१९ या खात्यात जमा झालेली एकूण रक्कम आणि वाटप केलेल्या रकमेचा तपशील मागविला होता. मुख्यमंत्री सहाय्यता निधी कक्षाचे सहाय्यक लेखापाल मिलिंद काबाडी यांनी अनिल गलगली यांना एकूण जमा रक्कम व वाटपाची माहिती दिली. ३ ऑगस्ट २०२० पर्यंत एकूण ५४१.१८ कोटी रुपये जमा झाले आहेत. या रक्कमेपैकी फक्त १३२.२५ कोटी रुपये इतका खर्च करण्यात आला आहे. खर्च झालेल्या रक्कमेपैकी २० कोटी रुपये सेंट जॉर्ज हॉस्पिटल, मुंबईला देण्यात आले असून, ३.८२ कोटी रुपये वैद्यकीय शिक्षण व संशोधन विभागाला देण्यात आले आहेत. औरंगाबाद येथील रेल्वे अपघातातील १६ मजुरांना प्रत्येकी ५ लाख रुपये याप्रमाणे तर, मृत व्यक्तीला ८० लाख रुपयांची आर्थिक मदत देण्यात आली. ३६ जिल्ह्यात स्थलांतरित मजुरांचे रेल्वेचे भाडे ८८.६४ कोटी इतके दर्शविण्यात आले आहे. जालना आणि रत्नागिरी येथे कोविड लॅबोरेटरीसाठी प्रत्येकी १.०७ कोटी देण्यात आले आहेत. तर, कोविड रुग्णांच्या प्लाझ्मा उपचारासाठी १६.८४ कोटी रुपये हे वैद्यकीय शिक्षण विभागास दिले गेले आहे.

अनिल गलगली यांनी मुख्यमंत्री उद्धव बाळासाहेब ठाकरे यांना पत्र लिहून मागणी केली आहे की, पालिका आणि शासकीय रुग्णालयांमधील वैद्यकीय सेवांच्या पूर्ततेसाठी जर मुख्यमंत्री सहायता निधी कोविड-१९मध्ये जमा झालेली रक्कम खर्च केली गेली तर, त्यांचा निधी योग्य कामात वापरल्याचा निश्चितपणे देणगीदारांना दिलासा मिळेल. आज मुख्यमंत्री सहायता निधीत भक्कम पैसा असतानाही आर्थिक टंचाईमुळे रुग्णालयातील व्यवस्थापन हे खाजगी लोक आणि स्वयंसेवी ससंस्थेकडून मदतीसाठी विनवण्या करत आहे, ही बाब चिंतेची असल्याची खंत गलगली यांनी व्यक्त केली. अनेक एनजीओ, कॉर्पोरेट्स आणि धार्मिक संस्था संकटावर मात करण्यासाठी राज्याच्या प्रयत्नांना हातभार लावण्यासाठी पुढे येत असून, या मुख्यमंत्री सहायता निधीस मदत करत आहेत