केरळ विमान दुर्घटना : बचाव पथकातील २० जणांना कोरोनाची लागण!

कोची : ‘वंदे भारत मिशन’ अंतर्गत भारतात परतणारे विमान कोझिकोड विमानतळाच्या धावपट्टीवरून घसरल्यामुळे दुर्घटना घडली. या दुर्घटनेत १८ प्रवाशांचा मृत्यू झाला, तर १२३ प्रवासी जखमी झाले. मात्र या दुर्घटनेनंतर मदतकार्य करण्यासाठी गेलेल्या तब्बल २० अधिकाऱ्यांना कोरोनाची लागण झाल्याची धक्कादायक माहिती आता समोर आली आहे. या प्रकारामुळे मदतकार्यात प्रत्यक्ष सहभागी झालेल्या तब्बल ६०० जणांना क्वारंटाईन करण्याची नामुष्की प्रशासनावर ओढावली आहे.

बचावकार्य करताना एक मृत प्रवासी कोरोना पॉझिटीव्ह, तर एका प्रवाशाला कोरोनाची लागण झाल्याचे आढळल्याने खळबळ उडाली होती. यामुळे विमानातील प्रवासी आणि बचाव कार्यात सहभागी झालेल्या सर्वांची कोरोना चाचणी करण्याचे आदेश केरळच्या आरोग्यमंत्र्यांनी दिले होते. या चाचणी अहवालातून तब्बल २० अधिकाऱ्यांना कोरोनाची लागण झाल्याचे समोर आले आहे.

केरळच्या ‘वंदे भारत मिशन’अंतर्गत दुबईहून येणाऱ्या एअर इंडिया एक्स्प्रेस विमानाची अपघात झाला. या मिशनअंतर्गत दुबईत अडकलेल्या लोकांना भारतात परत आणले जात असताना लँडिंग करताना विमान रनवेवरुन घसरल्याने मोठी दुर्घटना घडली होती.

तसेच कोरोनाची लागण झालेले अधिकारी केरळचे मुख्यमंत्री पी. विजयन यांच्याही संपर्कात आल्यामुळे त्यांनीही स्वतःला क्वारंटाईन केले आहे. आजच्या ध्वजारोहण समारंभालाही त्यांना उपस्थित राहता आले नसल्याने विजयन यांचे सहकारी के. सुरेंद्रन यांच्या हस्ते ध्वजारोहण करण्यात आले.