दिव्यांगांना रोजगारातील समान संधी

बँकेत लक्षणीय संख्येत दिव्यांग कर्मचारी काम करीत असल्याने अशा कर्मचार्‍यांशी सहजतेने कसे वागायचे व त्यांना अधिक प्रभावीपणे काम करण्यासाठी प्रेरित-प्रोत्साहित करण्याच्या उद्देशाने ‘डॉईश बँके’ने आपल्या सर्व कर्मचार्‍यांसाठी विशेष सत्रांचे आयोजन करण्याची पद्धत सुरू केली. त्यामुळेही दैनंदिन कामकाजामध्ये अधिक सकारात्मक व परस्परपूरक असे वातावरण निर्माण झाले आहे. दिव्यांग क्षेत्रात समदृष्टी, क्षमता विकास व संशोधनपर काम राष्ट्रीय स्तरावर व अग्रणी स्वरुपात काम करणारी ‘सक्षम’ ही सेवाभावी संस्था देशांतर्गत विविध प्रांतांमध्ये दिव्यांगांचे शिक्षण-प्रशिक्षण, कौशल्य विकास व खर्‍या अर्थाने पुनर्वसन करण्याच्या उद्देशाने विविध उपक्रम राबवत असून या प्रयत्नांना चांगला प्रतिसाद मिळू लागला आहे. दिव्यांग कल्याण क्षेत्रात काम करणार्‍या अन्य स्वयंसेवी संस्थाही दिव्यांग रोजगार क्षेत्रात पुढाकार घेत असल्याचे दिसून येते. सामाजिक संस्थांच्या दिव्यांग रोजगार पुनर्वसनातील आपले योगदान स्वरुपात काही व्यावसायिक-उद्योजक तर स्वयंप्रेरणेने दिव्यांग उमेदवारांना त्यांचे शिक्षण, कौशल्य व क्षमतेच्या आधारे रोजगारासाठी आवर्जून व प्रसंगी प्राधान्य तत्त्वावर प्रयत्नशील असल्याचे आशादायी चित्रही दिसून येत आहे. सद्यस्थितीत व विशेषतः केंद्रीय स्तरावर आणि कायदेशीर स्वरुपात समानसंधी कायद्याच्या कक्षेत, समाजातील दिव्यांग उमेदवारांना समाविष्ट करण्याचा केंद्र सरकारचा निर्णय खर्‍या अर्थाने परिणामकारक ठरला आहे. आता दिव्यांगजन उमेदवारांना पूर्वीपेक्षा अधिक व्यापक स्वरुपात रोजगार मार्गदर्शन व संधी उपलब्ध होणार आहेत. त्यातही विशेष बाब म्हणजे, आता विविध कंपन्या-संस्था दिव्यांगजनांना रोजगार देण्याच्या संदर्भात कायद्याच्या कक्षेपलीकडे जाऊन उत्स्फूर्तपणे काम करीत आहेत व त्यांच्या या प्रयत्नांना समाजातून मिळणारा वाढता प्रतिसाद उत्साहवर्धक ठरला आहे.