‘कोरोना’ विरुद्ध ‘हॅप्पीवाली फीलिंग’नाबाद अकरा

कोरोना रोगाने जगभरात सगळीकडेच थैमान माजवून जनसामान्यांचे जीवन हे अगदीच विस्कळीत केलेले आहे. याचा प्रभाव समाजात सर्व स्तरांतील लोकांवर, उद्योगधंद्यावर, रोजगारांवर तसेच संस्थांवर होतं असल्याचे चित्र कमी-अधिक फरकाने आता सर्वत्र पाहायला मिळत आहे. मग त्यात अनाथाश्रम किंवा वृद्धाश्रम यांसारख्य्या अनेक सामाजिक संस्थांनादेखील या परिस्थितीत असंख्य समस्यांना सामोरे जावे लागत आहे. आश्रमांमध्ये होणार्‍या भेटी पूर्णतः बंद असल्यामुळे त्या भेटींमधून जमा होणारी मदतदेखील काही प्रमाणात कमी, किंबहुना बंद झालेली आहे आणि आश्रमांना सदस्य संगोपनामध्ये अडचणी येऊ लागल्या आहेत. अशाच एकूण ११ गरजू आश्रमांपर्यंत अन्नधान्याची मदत पोहोचवण्याचे कार्य ‘हॅप्पीवालीफीलिंग’ने केलेले असून या कार्यात ‘रश्मीज स्माईल ट्रस्ट’(घाटकोपर) ‘आयुष ग्रुप’ (डोंबिवली) आणि ‘कल्याण युवा मंच’ या संस्थांचे बहुमोल योगदान लाभले.

 

 

“एकूण चार आश्रमांपर्यंत अन्नधान्य आम्ही पोहोचवले. ‘हॅप्पीवाली फीलिंग’कडून मदतीचे आवाहन आले की, मदत ही गरजूंपर्यंत पोहोचणारच याची शतप्रतिशत हमी मिळते. कारण, या सर्व तरुण मुलांची तळमळ आणि काम करण्याची पद्धत कौतुकापलीकडील आहे. या पुढेही असेच मदतकार्य निरंतरपणे चालू राहावे आणि निखळ आनंद द्विगुणित होत राहावा, हीच सदिच्छा.”