कोरोना कहर (भाग-१९) - अ‍ॅट्रोपा बेलाडोना’

रुग्णाला तापसुद्धा अचानकच येतो. तापामध्ये रुग्णाची त्वचा लालसर होते. डोळे लाल होतात. तापामध्ये अंग अतिशय तापते. परंतु, रुग्णाचे हात व पायाचे तळवे हे थंड असतात. तीव्र तापातही रुग्णाला विषाक्तपणा किंवा रक्तात विषार पसरणे, अशी चिन्हे दिसत नाहीत. तसेच तापामध्ये रुग्णाला उजेड अजिबात सहन होत नाही. तसेच आवाजही सहन होत नाही.

रुग्णाला अतिशय गरम वाटते. अंतर्गत गरमी वाटते. रुग्णाला तापामध्ये तहान लागत नाही किंवा अतिशय तहान लागते. घसा व डोळे खूप लाल होतात. रुग्णाला गिळायला अतिशय त्रास होतो. पाणीसुद्धा गिळताना त्रास होतो. टॉन्सिल्सची वाढ होते व त्यात पूसुद्धा होतो. तापामध्ये रुग्णाला लिंबू सरबत व लिंबाचे पदार्थ खावेसे वाटत राहतात. तापामध्ये रुग्णाचे डोके प्रचंड दुखते. चक्कर येते.

फुफ्फुसाच्या रक्तवाहिन्यांमध्येही रक्तसंचय झाल्यामुळे फुफ्फुसे व श्वासनलिका आकुंचन पावतात. डांग्या खोकल्याप्रमाणे खोकला येतो. रुग्णाला खोकल्यामुळे धाप लागते. श्वास घेताना कण्हायला होते. श्वसनाचा वेग जास्त होतो, तापामध्ये रुग्ण भ्रमित अवस्थेतही जाऊ शकतो. जोरात रडतो, आवाज करतो. वेगात बोलतो, खूप अस्थिर असतो, स्वभाव तापट व चिडखोर होतो. स्वभाव भित्रा होतो, पटकन रडतो, पटकन चिडतो, त्याला आजारातून पटकन बरे व्हायचे असते. घाई घाई करतो, त्याचा प्रत्येक गोष्टीत स्वातंत्र्य व मोकळेपणा पाहिजे असतो. लहान मुलांमध्ये या औषधाचा फार चांगला उपयोग होतो.