सेनेसमोर लोटांगण घालून काँग्रेस पक्ष संपवून बसाल : संजय निरुपम

मुंबई : महाविकास आघाडी प्रणित सरकारवर काँग्रेस नेते माजी खासदार संजय निरुपम यांनी जोरदार हल्लाबोल चढवला आहे. मातोश्री - २ या इमारतीत गैरव्यवहार झाल्याचा आरोप केल्यानंतर त्यांच्याविरोधात पक्षविरोधी कारवाईच्या हालचाली होत असल्याचा आरोप त्यांनी केला आहे. या सगळ्यावर निरुपम यांनी टीका करत राज्यातील काँग्रेस नेत्यांना सल्ला दिला आहे. शिवसेनेला अंगावर घेतले नाही, त्यांच्यासमोर झुकत राहिलात तर उरली सुरला काँग्रेस पक्षही राज्यात संपुष्टात येईल. 

मंत्र्यांनी शिवसेनेसमोर झुकणे थांबवावे, असे आवाहन त्यांनी केले आहे. खासदार संजय निरुपम म्हणतात, "सरकारमध्ये मतभेत असतात. सत्तेतील इतर पक्षाला प्रश्न विचारणे गुन्हा आहे का ?, काँग्रेसने पक्ष शिवसेनेत विलीन केला आहे का ? एखादा प्रश्न विचारला तर मी पक्षविरोधी कसा झालो. म्हणजे उद्ध्व ठाकरे यांच्या मातोश्री - २ या बंगल्याच्या गैरव्यवहाराबद्दल मी काहीच बोलू नये का ?, असे थेट प्रश्न त्यांनी विचारत प्रदेशाध्यक्ष बाळासाहेब थोरात यांनाच लक्ष्य केले आहे.