वयाच्या शंभरीत आजोबांनी जिद्दीने हरविले कोरोनाला
Total Views |
मुंबई : जोगेश्‍वरी पूर्व परिसरातील महापालिकेच्‍या हिंदुहृदयसम्राट बाळासाहेब ठाकरे रुग्‍णालयात शतकपूर्ती करणाऱ्या एका आजोबांनी कोरोनावर मात केली आहे.या आजोबांचा जन्‍म १५ जुलै १९२० रोजीचा आहे. शतकपूर्ती होण्‍याच्‍या उंबरठ्यावर असतानाच आजोबांना कोरोनाने गाठले आणि घरच्‍या सगळ्याच मंडळींच्‍या काळजाचा ठोका चुकला. आजोबांचा ‘पॉझिटिव्‍ह रिपोर्ट’ आल्‍यानंतर लगेचच १ जुलै रोजी आजोबा महापालिकेच्‍या हिंदुहृदयसम्राट बाळासाहेब ठाकरे रुग्‍णालयात दाखल झाले. आजोबांचे वय लक्षात घेता, रुग्‍णालयातील डॉक्‍टरांनी व कर्मचाऱ्यांनी व्‍यवस्थित काळजी घेतली. पूर्वी शिक्षक असणाऱ्या आजोबांनीदेखील उपचारांना अतिशय चांगला प्रतिसाद देत कोरोनावर मात केली. उद्याच्‍या १५ जुलै रोजी १०१ व्‍या वर्षात पदार्पण करत असलेल्‍या आजोबांना मंगळवारी रुग्‍णालयातून डिस्‍चार्ज देण्‍यात आला, तो त्‍यांचा शतकपूर्तीचा वाढदिवस साजरा करतच ! कोरोनावर मात करणाऱ्या या आजोबांनीही आपल्‍या खणखणीत आवाजात डॉक्‍टरांचे आणि कर्मचाऱ्यांचे आभार मानत कांदिवलीतील आपल्‍या घराकडे कूच केली.
मूळचे सिंधूदुर्ग जिल्‍हा होण्‍यापूर्वीच्‍या देवगड तालुक्‍यातील नारिंग्रे गावचे ते रहिवासी आहेत. आजोबांनी मिठबांव, दहिबांव, विजयदुर्ग, कोळोशी, नारिंग्रे अशा विविध गावातील जिल्‍हा परिषद शाळांमध्‍ये शिक्षक म्‍हणून काम केले. ३१ जुलै १९७८ रोजी मुख्‍याध्‍यापक म्‍हणून निवृत्त झालेल्‍या आजोबांचे अनेक विद्यार्थी आज देश-विदेशात कार्यरत आहेत. सध्‍या आजोबा आपल्‍या मुलाकडे कांदिवली परिसरात राहतात. आजोबांच्‍या घरातील काही व्‍यक्तिंना कोरोनाची बाधा झाली आणि त्‍यानंतर आजोबांनाही कोरोनाची लक्षणे दिसू लागली. दवाखान्‍यात दाखल झाल्‍यानंतर आजोबांना न्‍युमोनिया देखील असल्‍याचे लक्षात आले आणि मग अतिदक्षता विभागात आजोबांवर उपचार सुरु झाले.
मुळातच शिक्षक असणाऱ्या आजोबांचा खणखणीत आवाज आणि कडक शिस्तीचा अनुभव रुग्‍णालयातील डॉक्‍टरांनी आणि कर्मचाऱ्यांनीही घेतला. जेवणाच्‍या आणि औषधाच्‍या वेळा काटेकोरपणे पाळणाऱ्या आणि डॉक्‍टरांच्‍या सूचना लक्षपूर्वक ऐकून अंमलात आणणाऱ्या आजोबांची कोरोनाशी सुरु असलेल्‍या लढ्यात सरशी झाली. आज आजोबांना डिस्‍चार्ज देण्‍यात आला तेव्‍हा रुग्‍णालयातील कर्मचाऱ्यांनी आवर्जून केक आणून आजोबांचा शतकपूर्तीचा वाढदिवस साजरा करत आजोबांचे आशीर्वाद घेतले. तर आजोबांनीही रुग्‍णालयातील सर्वच डॉक्‍टर आणि कर्मचा-यांचे भरभरून आभार मानले.
