‘फेअर अँड लवली’तून 'फेअर' गायब होण्याचे संकेत!

मुंबई : भारतीय स्त्री पुरुषांच्या सर्वाधिक पसंतीच्या फेअरनेस क्रीम ‘फेअर अँड लवली’मधून आता फेअर हा शब्द गायब होणार आहे. हिंदुस्थान लीव्हर लिमिटेड या फेअर अँड लव्हलीचे उत्पादन करणाऱ्या कंपनीने हा निर्णय घेतला असून, फेअर अँड लवली च्या रिब्रँडिंगमध्ये फेअर हे नाव वगळले जाणार आहे. भारतीयांच्या अनेक पिढ्यांची पसंती बनलेल्या या फेअरनेस क्रीमचे रिब्रँडिंग हा एक वेगळा प्रयोग ठरणार आहे.

फेअर अँड लवलीमधील फेअर या शब्दातून फक्त गोरेपणाशी किंवा उजळपणाशी संबंधित मर्यादित अर्थ साधला जायचा. त्यामुळे वेळोवेळी हिंदुस्थान लिव्हर लिमिटेडवर टिकाही व्हायची. भारतीय पुरुषांना असलेल्या गोरेपणाच्या आकर्षणाचा व्यापार केला जात असल्याची टीका फेअर अँड लवलीच्या जाहिरात कँपेनवर अनेकदा झाली आहे.

हिंदुस्थान लिव्हर लिमिटेडच्या फेअर अँड लवलीचे नाव बदलण्याच्या निर्णयामागे अमेरिकेत अलीकडेच झालेल्या जॉर्ज क्लॉईडच्या हत्येनंतर उसळलेल्या आंदोलनाची किनार असण्याची शक्यता आहे. सौंदर्य फक्त गोरेपणाशी किंवा उजळपणापुरतेच मर्यादित नाही, हे अधोरखित करण्याचा कंपनीचा प्रयत्न असल्याचे हिंदुस्थान लिव्हरकडून सांगण्यात आले आहे. म्हणूनच यापुढे फेअर अँड लवलीमधील फेअर हा शब्द वगळला जाणार आहे.

हिंदुस्थान लिव्हरची पालक कंपनी असलेल्या युनिलिव्हरच्या प्रसिद्धी पत्रकात या बदलाविषयीची माहिती देताना सांगितले, की कंपनीची उत्पादने फक्त गोऱ्या त्वचेची निगा घेण्यासाठी नाहीत. फेअरनेस या शब्दात फक्त उजळपणाला प्राधान्य दिले जात असल्याचा बोध होतो. फेअरनेस, व्हाईटनिंग, लाईटनिंग अशा सर्वच विशेषणांना आणि शब्दांचा हिंदुस्थान लिव्हरच्या स्कीन केअर उत्पादनांमध्ये स्थान नसणार आहे. फेअर अँड लवलीचे नाव बदलण्याचा निर्णय या धोरणाचाच एक भाग आहे.