मी कटप्पा नको रे बाप्पा

देशाच्या शूर सैनिकांचे, नागरिकांचे मनोबल वाढवण्याऐवजी हुसेन दलवाई म्हणाले की, ‘चीनचा एकही सैनिक मारला गेला नाही.’ हे बोलून दलवाईंना काय साध्य करायचे आहे? हेच की चिनी सैनिक शूर आहेत. चीन समर्थ देश आहे. त्याच्यापुढे आपला देश आणि आपले सैनिक काही नाहीत? हे असे का? ते असेही म्हणाले की, रा. स्व. संघाच्या स्वयंसेवकांना काठी घेऊन सीमेवर पाठवा. तर दलवाईसारख्यांना हे सांगायची गरज नाही. ‘हम दिन चार रहे ना रहे, तेरा वैभव अमर रहे माँ...’ असा संकल्प असणारे संघाचे स्वयंसेवक वेळ आली तर सीमेवरही लढतील. दलवाईसारख्यांना कोण विचारतो? हुसेन दलवाईंसारखी व्यक्ती काहीबाही बरळतच असते. ते का मनावर घ्यायचे, असे वाटलेही. पण ‘म्हातारी मेली याचे दु:ख नसते तर काळ सोकावतोय’ याकडे लक्ष वेधायचे असते. त्यामुळे दलवाईंसारख्यांवरही मत व्यक्त करावे लागते. दलवाई यांनी नुकतेच एक वक्तव्य केले. अर्थात ते वक्तव्यच करतात. बाकी काही करत नाहीत म्हणा. त्यांचे म्हणणे असे की, सीमेवर काठ्या घेऊन रा. स्व. संघवाल्यांना पाठवा. का तर म्हणे सीमेवर सरकारने सैनिकांना नि:शस्त्र का पाठवले? काठ्या घेऊन का पाठवले? खरे म्हणजे दलवाई यांनी हा प्रश्न त्यांच्या सध्याच्या मालक कंपनीला विचारावा. दलवाईंनी जरा इतिहास पाहावा. वयाने तसे ज्येष्ठच आहेत. राजकारणात चांगला स्वार्थ साधतायत, म्हणजे तेवढी समजही असावीच त्यांना. सीमेवर सैनिक कसे आणि का गेले, याबाबत त्यांनी जरा अभ्यास करावा. आपल्या सैनिकांनी शत्रूशी लढता लढता हौतात्म्य पत्करले. या शूरांच्या आई-वडिलांनी आपल्या शुर बाळांचे हौतात्म्य तितक्याच शौर्याने स्वीकारले. सगळा देश या शूरांपुढे नतमस्तक आहे. आपल्या सैनिकांनीही चिनी सैनिकांना चांगलेच अस्मान दाखवले. पण दलवाई सांगत सुटले आहेत की, चीनचे नुकसान झाले नाही बरं का! त्यांचा एकही सैनिक मारला गेला नाही. चिनी सैनिकांबद्दल चांगले बोलावे लागणे, ही दलवाई यांची विवशता आहे की विकृती? दलवाई, जर डोळ्यातला आणि डोक्यातला विद्वेष, अज्ञान कमी केले तर वास्तव समजेल. सगळा देश चीनच्या विरोधात उभा आहे. बाकी तुमचेही बरोबरच आहे. रा. स्व. संघाबद्दल काहीबाही बोलले नाही तर तुमचे विद्वेषाचे दुकान कसे चालणार?