आता ‘आर्थिक सर्जिकल स्ट्राईक’

आचार्य यांच्या मते, आर्थिक आघाडीवर चीनला लगाम घालणे इतके सहज सोपे नाही. कारण सध्याच्या काळात कळत-नकळतपणे आपण चिनी वस्तू खरेदी करत आहोत. त्यामुळे चिनी वस्तूंवर बहिष्कार टाकण्यापूर्वी भारत सरकारला आणि भारतीय म्हणून आपल्याला संपूर्ण रणनीती बनवणे आवश्यक ठरणार आहे, असे वाटते. त्यानंतर त्यावर काम करावे लागेल. आचार्य यांच्या मते, चीनला पराभूत करण्यासाठी सैन्य आणि सरकारने सीमेसह आर्थिक आघाडीवर एकत्र काम करणे आवश्यक असणार आहे. सध्याच्या घडीला चीन आणि भारत या दोन देशांमधील व्यापार 100 अब्ज डॉलर्सहून अधिक आहे. चीनकडून भारतात येणारी गुंतवणूक अब्ज डॉलर्सच्या आसपास आहे.

चीनला आर्थिकदृष्ट्या काढून टाकण्यापूर्वी, सरकारला आपल्याबरोबर दुसरा देश आणावा लागण्याची शक्यता आहे किंवा देशांतर्गत आघाडीवर इतके बळकट व्हावे की, त्या सर्व गोष्टी स्वत: बनवून आपल्या तंत्रज्ञानाचा विकास करू शकतील. यासाठी दूरदृष्टी ठेऊन ‘मेक इन इंडिया’ कार्यक्रम हाती घेण्यात आला आहेच. त्याला आता भारतीय म्हणून आपण सर्वांनी ‘मेड इन इंडिया’मध्ये रुपांतरीत करण्याची गरज आहे. चीन-भारत हा संघर्ष त्यामुळे केवळ सीमेवरचा नसून तो प्रत्येक भारतीयाच्या दैनंदिन जीवनाशी संबंधित आहे,

हे आपण जाणले पाहिजे. केवळ पोस्ट करून देशप्रेम व्यक्त करणे इतकेच अभिप्रेत नसून कृतिशीलतादेखील महत्त्वाची आहे. चिनी मालाच्या होळ्या जरी आज होत असल्या तरी ही भावना कायम राहणे आणि ती प्रत्यक्ष वर्तनात येणे नक्कीच आवश्यक आहे. कोरोनामुळे संपूर्ण जागतिक अर्थव्यवस्था ढासळत आहे, तेथे भारताला मजबुतीसाठी गुंतवणुकीची आवश्यकता आहे. गलवानच्या घटनेनंतर तंत्रज्ञान व सुरक्षा क्षेत्रात चीनचे अस्तित्व असलेल्या क्षेत्रात काही निर्णय घेता येणे शक्य आहे. सरकार ते करेलही. मात्र, भारतासाठी असणारे हे आव्हान नक्कीच एक संधी आहे आणि भारतीय म्हणून देशसेवा करत आपण या संधीचे सोने करणे आता काळाची गरज आहे.