धक्कादायक! २५ वर्षीय अभिनेत्रीने 'पोस्ट' लिहून केली आत्महत्या

इंदुर : 'क्राईम पेट्रोल’ या मालिकेतील अभिनेत्री पेक्षा मेहता (२५) हिने सोशल मीडियावर एक शेवटची पोस्ट लिहीली. 'सबसे बुरा होता है सपनों का मर जाना' आणि त्यानंतर घरात गळफास घेत आत्महत्या केली. इंदुर येथील आपल्या राहत्या घरात तिने सोमवारी रात्री उशीरा गळफास लावून घेतला. मंगळवारी सकाळी तिचे शरीर पंख्याला लटकलेले आढळले. डॉक्टरांनी तिला मृत घोषित केले. 

‘क्राईम पेट्रोल’, ‘मेरी दुर्गा’ आणि ‘लाल इश्क’ या मालिकांमध्ये काम करणाऱ्या प्रेक्षाला गेल्या काही दिवसांपासून काम मिळत नसल्याने ती तणावात असल्याचे बोलले जात होते. सोशल मीडियावर लिहिलेल्या पोस्टवरून तिने आत्महत्येचे पाऊल हे नैराश्येतून उचलले आहे, असा दावा केला जात आहे. टीव्ही मालिका करणारी प्रेक्षा लॉकडाऊनमध्ये आपल्या कुटूंबियांसोबत राहत होती. पोलीसांनी या प्रकरणी गुन्हा दाखल करून तपास सुरू केला.