'अम्फान' परिस्थितीचा आढावा घेण्यासाठी पंतप्रधान मोदी बंगालमध्ये दाखल

नवी दिल्ली : पश्चिम बंगाल आणि ओडिशा येथील महा चक्रवत अम्फानच्या हाहाकारानंतर पंतप्रधान नरेंद्र मोदी शुक्रवारी दोन्ही राज्यांचा दौरा करणार आहेत. शुक्रवारी सकाळी पंतप्रधान मोदी पश्चिम बंगालमधील कोलकाता विमानतळावर पोहोचले, तेथे राज्याच्या मुख्यमंत्री ममता बॅनर्जी यांनी त्यांचे स्वागत केले. यानंतर पंतप्रधान मोदी अम्फानबाधित भागाचे हवाई सर्वेक्षण करणार. तत्पूर्वी, पंतप्रधानांनी गुरुवारी सांगितले की, ‘चक्रीवादळामुळे पीडित लोकांची सर्वोतोपरी मदत केली जाणार आहे’ पंतप्रधान नरेंद्र मोदी जवळपास तीन महिन्यांनंतर दौरा करणार आहेत. उत्तर प्रदेशातील चित्रकूट आणि प्रयागराज येथे पंतप्रधान मोदींनी २९ फेब्रुवारीला भेट दिली होती. कोरोना संकटामुळे तब्बल ८३ दिवसांनी पंतप्रधान पश्चिम बंगाल आणि ओडिशाचा दौरा करणार आहेत.

ओडिशाचे मुख्यमंत्री नवीन पटनाईक यांनी ममता बॅनर्जी यांच्याशी संवाद साधला. अम्फान चक्रीवादळामुळे झालेल्या नुकसानीसंदर्भात त्यांनी बंगालला सर्वतोपरी मदत करण्याचे आश्वासन दिले आहे. बंगालच्या मुख्यमंत्री ममता बॅनर्जी यांनी गुरुवारी म्हंटले होते की ‘मी माझ्या आयुष्यात एवढ्या तीव्र चक्रीवादळ आणि तोटा कधीही पाहिला नाही.’ त्याच बरोबर त्यांनी पंतप्रधान नरेंद्र मोदींना चक्रीवादळ बाधित भागाची पाहणी करण्यासाठी येण्याची विनंतीदेखील केली होती.

दरम्यान, केंद्रीय गृहमंत्री अमित शहा यांनी ओडिशाचे मुख्यमंत्री नवीन पटनायक आणि पश्चिम बंगालच्या मुख्यमंत्री ममता बॅनर्जी यांच्याशी संवाद साधला. परिस्थितीशी सामना करण्यासाठी केंद्राकडून सर्वतोपरी मदत देण्याचे आश्वासन दिले. अम्फानने पश्चिम बंगालमध्ये मोठ्या प्रमाणावर विनाश केला आहे. ७२ लोक मरण पावले असून, दोन जिल्हे पूर्णपणे उध्वस्त झाले. या वादळामुळे हजारो लोक बेघर झाले आहेत, अनेक पूल उद्ध्वस्त झाले आहेत आणि सखल भाग पाण्याखाली गेले आहेत.