कोरोनाच्या लढाईत जगाला भारतीय संस्कृतीचे दर्शन

कोरोनापासून दूर राहण्यासाठी दो गज दुरी, बहोत है जरुरी या मंत्राचा अवलंब यापुढील काळातही करायचा आहे, असे प्रतिपादन पंतप्रधान नरेंद्र मोदी यांनी रविवारी सकाळी मन बात द्वारे देशवासियांशी संवाद साधताना केले. कोरोनाविरोधातील लढ्यात सरकारला देशातील नागरिकांचे सर्वतोपरी सहकार्य लाभते आहे. संकटाच्या काळात लोक एकमेकांची ज्या पद्धतीने मदत करीत आहे, ते अतिशय अभिमानास्पद आहे. कोरोनाविरोधातील लढा हा खऱ्या अर्थाने जनतेचा लढा असून प्रत्येक नागरिक हा सैनिक आहे. गरिबांची मदत असो, त्यांच्या अन्नपाण्याची व्यवस्था असो, रुग्णालयांची व्यवस्था असो, वैद्यकीय उपकरणांची देशातच निर्मिती करायची असो अशा प्रत्येत गोष्टीसाठी देशातील नागरिक सहभाग नोंदवित आहेत. भविष्यात जेव्हा कोरोनाविरोधातील लढ्याची जगभरात चर्चा होईल, तेव्हा भारतीय नागरिकांनी दाखविलेल्या असामान्य धैर्याचा विशेष उल्लेख केला जाईल. मात्र, अद्यापही देशातील नागरिकांनी दो गज दुरी, बहोत है जरूरी या मंत्राचे पालन यापुढेही करणे गरजेचे आहे, असे पंतप्रधान मोदी म्हणाले.

 

 

 

टाळी – थाळी वाजविणे असो किंवा विजदिवे मालवून दिवे लावणे असो अशा सर्व उपक्रमांमध्ये जनतेने सहभाग नोंदविला आहे. त्यामुळे देशात एखादा महायज्ञ सुरू असल्यासारखे भासत आहे असून देशातील नागरिकांमध्ये लढाईत विजय मिळविण्याचा आत्मविश्वास निर्माण झाला आहे. लॉकडाऊन असतानाही देशवासियांना अन्नधान्याची कमतरता भासू नये, म्हणून शेतकरी शेतात काम करीत आहेत, कोणी घरभाडे माफ करीत आहे, कोणी निवृत्तीवेतन अथवा पुरस्कारामध्ये मिळालेली रक्कम कोरोना फंडात दान देत आहे. कोणी भाजीपाला वाटत आहे, तर कोणी गरिबांच्या अन्नपाण्याची सोय करीत आहे. देशातील १३० कोटी जनता आपापल्या परिने या लढाईत आपला सहभाग नोंदवित असल्याचेही त्यांनी सांगितले.