साधूंच्या हत्याकांडास जबाबदार कोण?

वांद्रे पश्चिम स्थानकालगतच्या मशिदीसमोरील रस्त्यावर त्या दिवशी जमलेला जमाव पाहता दिल्लीमधील आनंद विहार परिसरामध्ये आपापल्या राज्यात जाण्यासाठी जी गर्दी उसळली होती, त्याची आठवण यावी. पण, दिल्लीमधील लोकांच्या हातात किमान सामानसुमान तरी होते. वांद्रे येथील जमाव गावी जाण्याच्या हेतूने तेथे जमला असेल, तर त्यांच्या हातामध्ये साधी पिशवीही नव्हती. मग त्यांच्या येण्याचा नेमका हेतू काय होता? जमलेल्या जमावाची उपासमार होत असल्याने त्याविरुद्ध दाद मागण्यासाठी हा जमाव एकत्रित झाल्याचे सांगण्यात आले. पण, वांद्रे पश्चिमेस स्थानकालगत अन्न आणि नागरी पुरवठा खात्याचे कोणतीही महत्त्वाचे कार्यालय नसताना जमावाने तेथे कशाला गर्दी केली होती? तसेच शहरात सर्वत्र जमावबंदी असताना बंदोबस्तासाठी असलेल्या पोलिसांची नजर चुकवून एवढ्या मोठ्या संख्येने हा जमाव तेथे आलाच कसा? या सर्व प्रकाराला कोणाची फूस होती? राज्य कोणत्या परिस्थितीतून जात आहे, हे लक्षात न घेता जमावास तेथे आणण्यामागील नेमका हेतू काय होता? आम्ही त्या जमावाची समजूत काढल्याने ते परत जात आहेत, असे त्या ठिकाणी उपस्थित काही नेते सांगत असल्याची दृश्ये जनतेने वृत्तवाहिन्यांवर पाहिली आहेतच. या नेत्यांच्या सांगण्यावरून तो जमाव परत गेला असेल तर तो तेथे कोणाच्या सांगण्यावरून आला, हा प्रश्न साहजिकच उपस्थित होतो? तसेच ही सर्व नेतेमंडळी ‘लॉकडाऊन’ असताना तेथे कशी काय ‘प्रकट’ झाली? भाषण करण्यासाठी तेथे ‘लाऊडस्पीकर’ कसा काय आला? कशासाठी हा सर्व उद्योग करण्यात आला होता? सर्व देश कोरोना संकटाविरुद्ध एकदिलाने लढत असताना असंतोषाची ठिणगी टाकण्याचे उद्योग कोणाचे? समाजातील अनेकांचे हाल होत आहेत, पण त्यांना मदत करण्यासाठी शासकीय आणि स्वयंसेवी यंत्रणा कार्यरत आहेत. त्यांच्याकडे मदत मागायची का गर्दी करून कोरोनाचा प्रादुर्भाव आणखी वाढवायचा? सरकारने याचा शोध घ्यायलाच हवा.