तब्लिगी जमातमध्ये औरंगाबादच्या २५ जणांची हजेरी

दिल्ली येथील निझामुद्दीन परिसरातील १२ व १३ मार्च रोजी झालेल्या 'तबलिगी जमात'च्या धार्मिक कार्यक्रमात देश-विदेशातून व देशातील अनेक राज्यांतून आलेले सुमारे अडीच हजार नागरिक सहभागी झाले होते. त्यापैकी २४ जणांना करोनाचा संसर्ग झाला आहे व ४४१ व्यक्तींमध्ये करोनाची लक्षणे आढळून आली आहेत, तर यातील अनेकांचा मृत्यू झाल्याचेही समोर येत आहे. दरम्यान, याच कार्यक्रमात सहभागी झालेल्या व नऊ मार्चपासून औरंगाबाद शहरातील नातेवाईकांकडे वास्तव्यास असलेल्या सात व्यक्तींची बुधवारी सकाळी जिल्हा सामान्य रुग्णालयामध्ये तपासणी करण्यात आली. त्यानंतर बुधवार सायंकाळपर्यंत सुमारे २५ व्यक्तींची तपासणी करण्यात आली, जे निजामुद्दीनच्या कार्यक्रमात एकतर सहभागी झाले होते किंवा कार्यक्रमात सहभागी झालेल्यांच्या संपर्कात तरी आले होते.मराठवाड्यातून मरकजला गेलेल्यांची संख्या १८० पेक्षा अधिक आहे. औरंगाबादेतील २४ जणांना होम क्वाॅरंटाइन केले आहे. या तपासणीमध्ये त्यांच्यामध्ये करोना विषाणू बाधेची लक्षणे आढळून आली नसली तरी नवीन मार्गदर्शक तत्वांनुसार १२ व्यक्तींचे स्वॅब घेण्यात आले आहेत.यातील अनेकजण अंदमान-निकोबारचे रहिवासी आहेत, असे जिल्हा शल्यचिकित्सक व नोडल ऑफिसर डॉ. सुंदर कुलकर्णी यांनी सांगितले.