महाआरोग्य शिबिराच्या माध्यमातून सत्कर्म

‘सत्कर्म बालक आश्रम, बदलापूर’ आणि ‘रश्मीज स्माईल ट्रस्ट, घाटकोपर’ यांच्या संयुक्त सहभागाने पार पडले, महाआरोग्य शिबीर! ज्यात पाचशेहून जास्त गरजूंनी लाभ घेतला.

‘सत्कर्म आश्रम’ ही संस्था बदलापूर येथे २३ अनाथ मुलांचे संगोपन करण्याचे कार्य करते, या संस्थेचे सचिव मकरंद वढवेकर यांच्या डोक्यात कल्पना आली की, बदलापूर, अंबरनाथ परिसरात बर्‍याच वीटभट्ट्या, वनवासी पाडे आणि गरीब वस्त्या आहेत. त्यामुळे या भागात ‘आरोग्य’ या विषयावर करण्यासारखे खूप काही कार्य आहे. संस्थेच्या इतर सदस्यांच्या सामाईक विचाराने आश्रमात आरोग्य शिबीर पार पडण्याचा निर्धार पक्का झाला. म्हणतात ना, विचार चांगला असला आणि भावना नि:स्वार्थ असेल तर कार्यात कोणतेच अडथळे येत नाहीत. अगदी तसेच या कल्पनेला ‘रश्मीज स्माईल ट्रस्ट’ संस्थेची साथ मिळाली आणि आरोग्य शिबीर या छोट्याशा कल्पनेचे रूपांतर महाआरोग्य शिबिरात झाले आणि त्याचा लाभ ५०८ गरजूंनी घेतला. या शिबिरात इतर दोन संस्था प्रत्यक्ष स्वयंसेवक म्हणून उपस्थित होत्या, ज्याची नावे ‘हॅप्पीवाली फीलिंग’ आणि ‘सारथी फाऊंडेशन’ अशी आहेत, तसंच ‘रश्मीज स्माईल ट्रस्ट’ संस्थेच्या २५, तर स्थानिक तीन डॉक्टरांचा सहभाग होता.

शिबिरांतर्गत सामान्य आरोग्य तपासणी, कर्करोग तपासणी, एचआयव्ही तपासणी, डोळे, दात तसेच कर्णतपासणी, त्वचा रोगतज्ज्ञ यांच्याकडून तपासणी, जरूर तो सल्ला आणि नंतर औषधांचे मोफत वाटप या गोष्टीची सुविधा उपलब्ध करून देण्यात आली होती. वीटभट्ट्या तसेच वनवासी पाड्यावरून गरजूंना ने-आण करण्यासाठी खास बस आणि चारचाकीची व्यवस्थादेखील करण्यात आली होती. आरोग्य शिबिरासोबतच एक नावीन्यपूर्ण उपक्रम संस्थेने हाताळला, ज्याला नाव दिलं गेलं ‘क्लॉथ बँक.’ आजवर ब्लड बँक, मनी बँक ऐकून होतो, पण मनात विचार आला असेल की नक्की कसली बँक आहे! तर या ‘प्रोजेक्ट’अंतर्गत ‘रश्मीज स्माईल ट्रस्ट’ संस्थेकडून लग्नाच्या कपड्यांची भरलेली दोन कपाटे आश्रमाला दान करण्यात आली. हे कपडे लग्नात जोडप्यांनी एक-दोन वेळा वापरून चांगले धुऊन इस्त्री करून ठेवलेले होते. जवळ जवळ ते कपडे नवीनच वाटत होते. गोरगरिबांना महागडे कपडे घेणे परवडत नाहीत, खास अशा गरजूंना त्यांच्या शुभकार्यात विनामूल्य चांगले कपडे वापरता यावेत, या सद्भावनेने या ‘क्लॉथ बँक’चे नियोजन केले आहे. संस्थेच्या नावातच ‘सत्कर्म’ आहे म्हटल्यावर कार्यात गोडवा असणारच, तर याच गोडव्याने बदलापूर भागात गरजू रुग्णांना हे आरोग्य शिबीर आणि मोफत वाटलेली औषधे लाखमोलाची मदत ठरली.

या शिबिरात प्रत्यक्ष सहभागी काही निवडक सदस्यांच्या प्रतिक्रिया खालीलप्रमाणे नमूद केलेल्या आहेत :