‘कोरोना’ विषाणूचा जागतिक व्यवस्थेवरील हल्ला

२५ हून अधिक देशांमध्ये या विषाणूचा संसर्ग झालेले रुग्ण आढळून आले असून त्यात तीन भारतीयांचाही समावेश आहे. तिघेही केरळचे असून वुहानमध्ये शिकण्यासाठी गेले होते. परिस्थितीचे गांभीर्य ओळखून भारताच्या परराष्ट्र मंत्रालयाने कंबर कसली आहे. भारताने या आठवड्याच्या सुरुवातीपासून चिनी नागरिकांना तसेच चीनमध्ये वास्तव्य करणाऱ्या परदेशी नागरिकांना व्हिसा देणे बंद केले असून पुढील सूचना मिळेपर्यंत त्यांच्या भारतात येण्यावर निर्बंध लादले आहेत. एअर इंडियाने दोन विशेष विमानांच्या साहाय्याने वुहानमध्ये अडकलेल्या ६५४ भारतीय तसेच ७ मालदीवच्या नागरिकांना सुखरूप परत आणले आहे. विशेष म्हणजे, चीनशी खास मैत्री असलेल्या पाकिस्तानचे विद्यार्थी आणि नागरिक मात्र चीनमध्येच अडकून पडले आहेत. विशेष विमानाने त्यांना परत आणायची पाकिस्तानची ऐपत नाही, तर आपल्या विशेष विमानाने त्यांना पाठवायला चीनला सवड नाही. या पाकिस्तानी लोकांनी व्हिडिओद्वारे पंतप्रधान इमरान खान यांना मदतीसाठी आवाहन केले असून भारताप्रमाणे आपल्याला परत नेण्यासाठी व्यवस्था करण्याची विनंती केली आहे.

गेल्या सहा वर्षांमध्ये केवळ चीनच नाही, तर सौदी अरेबिया, इराक, सीरिया, येमेन आणि युक्रेनसारख्या देशांतील यादवी युद्धात अडकलेल्या ८० हजारांहून अधिक नागरिकांना सुखरूप परत आणताना भारताच्या परराष्ट्र मंत्रालयाने जी तत्परता दाखवली, तिचे जगभर कौतुक झाले. परदेशात फसवणूक झालेल्या स्त्रिया, विद्यार्थी, नोकरी-धंद्यानिमित्ताने परदेशात स्थायिक झालेले आणि त्या देशात राजकीय, आर्थिक, नैसर्गिक संकटात सापडलेले कामगार, एवढेच कशाला यादवी आणि युद्धग्रस्त देशांत अपहरण झालेल्या परिचारिका आणि धर्मप्रसारक, यातील कोणाबद्दलही भेदभाव न दाखवता, केवळ ते भारतीय आहेत, या एका कारणासाठी परराष्ट्र व्यवहार मंत्रालय धावून गेले. एवढेच काय, वेळोवेळी विविध देशांनी भारताला आपल्याही नागरिकांची सुटका करायची विनंती केली आणि भारताने तिला मान देऊन आपल्या या क्षमतेचा वापर त्या देशांशी असलेले संबंध मजबूत करण्यासाठी केला. ‘एअरलिफ्ट’ चित्रपट पाहिल्यास १९९०च्या दशकात अनिवासी भारतीयांबद्दल भारत सरकार आणि खासकरून परराष्ट्र मंत्रालय किती उदासीन होते, ते पाहून हळहळायला होते. भारतासाठीही कोरोना विषाणूचा प्रसार टाळणे आणि भविष्यात अशा प्रकारच्या संसर्गजन्य आजारांच्या प्रसाराला तोंड द्यायला आपली सार्वजनिक आरोग्य व्यवस्था तसेच आपत्ती निवारण क्षमता सज्ज ठेवणे आवश्यक आहे.