उपचारादरम्यान झाला मृत्यू
मुंबई : नाशिक येथील लासलगाव बस स्थानकात पेट्रोल अंगावर पडून गंभीर भाजलेल्या महिलेचा मुंबईत उपचारादरम्यान दुर्देवी मृत्यू झाला आहे. गेल्या सहा दिवसांपासून सुरू असलेली महिलेची मृत्यूशी झुंज अपयशी ठरली. भायखळा येथील मसिहा रुग्णालयात शुक्रवारी रात्री १२.३० वाजता पीडित महिलेचा मृत्यू झाल्याची माहिती रुग्णालयाने दिली आहे. मुंबईतील जे.जे.रुग्णालयात मृत पीडित महिलेचे शवविच्छेदन केले जाणार असून त्यानंतर मृतदेह लासलगाव येथे तिच्या राहत्या घरी पाठवण्यात येणार आहे.
१५ फेब्रुवारी रोजी लासलगाव बस स्थानकात आपसातील वादातून महिलेच्या अंगावर पेट्रोल पडून तिच्या कपड्यांनी पेट घेतला होता. यात सदर महिला ६७ टक्के भाजली होती. नाशिकच्या सिव्हिल रुग्णालयात महिलेला दाखल करण्यात आले होते. दरम्यान, गेल्या आठवड्यात शनिवारी मध्यरात्री पुढील उपचारासाठी पोलीस बंदोबस्तात मुंबईला हलवण्यात आले होते. पोलिसांनी संबंधित महिलेचा कथीत पती, त्याचे दोन साथीदार, पेट्रोल पंपाचा व्यवस्थापक आणि कर्मचाऱ्यांवर ज्वलनशील पदार्थाचा हयगयीने वापर केल्याचा गुन्हा दाखल केला होता.