फुल्ल टू धमाल करणार ‘स्वीटी सातारकर’

मुंबई : "तू जेव्हा थैलीत होता ना तेव्हा मी पहिलीत होते", "साडी बघायच्या वयात हा गाडी का बघतोय....." असे खटकेबाज संवाद असलेली आगळीवेगळी प्रेमकहाणी आता प्रेक्षकांसमोर उलगडणार आहे. "स्वीटी सातारकर" या चित्रपटाचा ट्रेलर सोशल मीडियाद्वारे लाँच करण्यात आला असून अवघ्या काही वेळातच सोशल मीडियावर उत्तम प्रतिसाद मिळाला आहे.

फ्रेश कलाकार आणि दमदार गोष्ट या चित्रपटात पाहायला मिळणार आहे. मुनाफ नाईक, संतोष साबळे यांनी निर्मिती केलेल्या या चित्रपटाचे दिग्दर्शन शब्बीर नाईक यांनी केले असून ध्रुव दास, सतीश जांबे, रिया तेंडुलकर, सुधाकर ओमळे आणि स्वरूप स्टुडिओझ हे या चित्रपटाचे प्रस्तुतकर्ते आहेत. सुमित गिरी यांनी चित्रपटाचे लेखन, संतोष मुळेकर यांनी संगीत दिग्दर्शन, फैसल महाडिक यांनी संकलन, मंगेश कांगणे आणि सुहास सावंत यांनी गीतलेखन केले आहे. चित्रपटात अमृता देशमुख, संग्राम समेळ, विजय निकम, गौरी जाधव, वंदना वाकनीस, पुष्कर पुष्कर लोणारकर, विनम्र भाबल, प्रशांत विचारे अशी दमदार कलाकार मंडळी दिसणार आहेत.

हलकीफुलकी कथा, उत्तम कलाकार, तांत्रिकदृष्ट्या परिपूर्ण असलेला हा चित्रपट निश्चितपणे प्रेक्षकांची दाद मिळवणार असल्याचे या ट्रेलरवरून कळते. खटकेबाज संवाद हे तर चित्रपटाचे विशेष वैशिष्ट्यच ठरणार आहे. त्यामुळे ज्या तरुणावर स्वीटी सातारकर जीव ओवाळून टाकते, तिला तो मिळणार का, याचे उत्तर चित्रपट पाहिल्यावरच मिळणार आहे. २८ फेब्रुवारीला हा चित्रपट प्रदर्शित होणार आहे.