कामगार कायद्यातील बदल : स्वरुप आणि अपेक्षा

चर्चेच्या अनेक फेर्‍यांनंतर तयार करण्यात आलेले वेतन संविदा २०१९ (वेज कोड) हे महत्त्वाचे विधेयक ऑगस्ट २०१९ मध्ये मंजूर झाले. त्यावर नियम बनविण्याची प्रक्रिया सुरू आहे. जुलै २०१९ औद्योगिक सुरक्षा आरोग्य आणि सेवाशर्ती संविदा (कोड), नोव्हेंबर २०१९ मध्ये औद्योगिक संबंध संविदा (कोड) आणि ११ डिसेंबर, २०१९ मध्ये सामाजिक सुरक्षा संविदा (कोड) हे तीन कोड लोकसभेत सादर करण्यात आले. लोकसभेत त्यावर चर्चा झाली आणि ही तिन्ही बिले संसदेच्या कामगार विषयक स्थायी समितीकडे पाठविण्यात आली. या स्थायी समितीचे अध्यक्ष बिजू जनता दलाचे खासदार भ्रात्रृ हरि हे आहेत. या समितीत सर्व पक्षांचे सुमारे ३० खासदार आहेत. त्यात महाराष्ट्रातील भाजप, काँग्रेससह शिवसेना व राष्ट्रवादी काँगे्रसचे खासदारही सदस्य आहेत. या समितीत कोडवर सविस्तर चर्चा झाली. कामगार व मालक संघटनांनी आपले म्हणणे सादर केले. स्थायी समितीने आपल्या शिफारसी सरकारला सादर केल्या. त्या आधारे दिनांक २१ सप्टेंबर, २०२० रोजी ही तिन्ही बिले संसदेत सादर झाली आणि मंजूर झाली. त्याचा थोडक्यात आढावा घेऊया.