नाथाभाऊंना मंत्रीपद द्या ! समर्थकांची मागणी
Total Views |
राष्ट्रवादीच्या कोट्यातून मंत्रीपद मिळणार का ?
मुंबई : ज्येष्ठ नेते आणि माजी मंत्री एकनाथ खडसे उर्फ नाथाभाऊ भाजपचा हिंदुत्वाचा अजेंडा सोडत राष्ट्रवादी काँग्रेसचे घड्याळ मनगटावर बांधणार आहेत. पक्षाचे अध्यक्ष शरद पवार यांच्या उपस्थितीत हा प्रवेश निश्चित झाला. शुक्रवारी दुपारपासूनच खडसेंच्या कार्यकर्त्यांच्या पक्ष कार्यालयाबाहेर एकच गर्दी होती. नाथाभाऊंना मंत्रीपद द्या !, अशी समर्थकांची मागणी आहे.
टायमिंग हुकला ?
एकनाथ खडसे यांच्या पक्षप्रवेशाचा वेळ हा दुपारी दोन वाजताचा ठरवण्यात आला होता. मात्र, यशवंतराव चव्हाण केंद्रात शरद पवार आणि जितेंद्र आव्हाड यांच्यातील बैठक लांबल्याने या पूर्वनियोजित कार्यक्रमाला वेळ लागला. खडसेंसह राष्ट्रवादीचे प्रदेशाध्यक्ष जयंत पाटील आणि इतर मंत्री व नेते उपस्थित होते. मात्र, पवार आणि आव्हाड यांची वाट पाहत साऱ्यांचाच खोळंबा झाला.
खडसेंचा वापर फडणवीसविरोधासाठी
एकनाथ खडसे यांनी ज्या प्रकारे भाजपवर टीका न करता देवेंद्र फडणवीस यांना लक्ष्य केले. ते पाहता राष्ट्रवादी काँग्रेस भाजप विरोधात किंबहुना देवेंद्र फडणवीसांच्या विरोधात राजकीय सुरुंग लावण्यासाठी खडसेंचा वापर करणार, अशी खेळी पवारांची असू शकते, अशीही शक्यता आहे.
मंत्री पद मिळणार का ?
एकनाथ खडसे ज्या काळात राज्यातील महाविकास आघाडी आणि राष्ट्रवादी काँग्रेसमध्ये सहभागी झाले आहेत, ते पाहता त्यांना मंत्रीपद मिळणार का याकडे साऱ्यांचे लक्ष्य आहे. याबद्दल काय बोलणी झाली त्याची माहिती खडसे आणि राष्ट्रवादी यांनी दिलेली नाही. त्यामुळे खडसे मंत्रीपद मिळवतात का हे देखील पाहणे औत्सुक्याचे आहे.
