मर्सिडीजने ७.४ लाख गाड्या मागविल्या परत!

मुंबई : जर्मन ऑटोमोबाइल कंपनी Daimler AG ने आपल्या मर्सिडीज-बेन्झ प्रकारातील गाड्या परत मागवल्या आहेत. मर्सिडीज-बेन्झच्या सुमारे ७ लाख ४४ हजार गाड्यांचे कंपनीने रिकॉल केले आहे. या कार ग्लास पॅनल आणि स्लायडिंग रूम फ्रेममध्ये तांत्रिक दोष असल्याने परत मागवल्याचे, कारण कंपनीने दिले आहे.

कारला देण्यात आलेले सनरुफ ग्लास पॅनल आणि स्लायडिंग रूम फ्रेममधील तांत्रिक दोषामुळे डिटॅच होऊ शकते. असे झाल्यास प्रवास करणाऱ्या व्यक्तींना धोका निर्माण होऊ शकतो. त्यामुळे कंपनीने याची गंभीर दखल घेत या कार परत मागवल्या आहेत. कंपनीने २००१ ते २०११ या कालावधीत तयार झालेल्या कार ग्राहकांकडून परत मागवल्या असून काही सी-क्लास, सीएलके-क्लास, सीएलएस क्लास आणि ई-क्लास या प्रकारातील कारचाही यामध्ये समावेश आहे. कंपनीच्या सर्व्हिस सेंटरमध्ये गाडी आणल्यानंतर शहानिशा करुन गरज भासल्यास दोष दूर करण्यात येईल, असे कंपनीच्या प्रवक्त्यांनी स्पष्ट केले.