पाकी हिंदूंना वाली कोण?

जगभरात मानवाधिकाराच्या गप्पा झोडणाऱ्या, पाकिस्तानात अल्पसंख्य हिंदू समाजाशी व्यवहार करताना मानवाधिकाराच्या कशा चिंधड्या उडवल्या जातात, हे दाखविणाऱ्या दोन घटना नुकत्याच उघड झाल्या. पाकिस्तानच्या सिंध प्रांतातील या घटना असून त्यापैकी एकात हिंदू मुलीला विवाहमंडपातून पळविण्यात आले, तर दुसऱ्या घटनेत धर्मांध मुस्लिमांनी थारपरकर परिसरातील हिंदू मंदिरात घुसून तोडफोड केली. उल्लेखनीय म्हणजे, या दोन्ही घटना इकडे भारतात सुधारित नागरिकत्व कायद्यावरून डाव्या, काँग्रेसी, बुद्धीजीवी, विचारवंत, अभ्यासकांनी ओकाऱ्या काढत धिंगाणा घालायला चालू केले त्याचवेळी घडल्या. परंतु, मुस्लिमांच्यापुढे वाकण्यासाठीच ज्यांचा जन्म झाला, त्यांना सीमेपलीकडे हिंदूंवर होणारा अन्याय-अत्याचार दिसणार नाहीच. उलट इथे भारतात सुखाचे आयुष्य कंठणाऱ्या मुस्लिमांच्या कथित गळचेपीच्या खोट्यानाट्या कहाण्या रंगवून आपल्या तुंबड्या भरण्यातच ते मशगुल राहतील. नव्वदच्या दशकात काश्मीर खोऱ्या तून लाखो हिंदूंना पलायन करण्यास भाग पाडणाऱ्या धर्मांध जिहाद्यांचा उल्लेख केल्यावर जसे यांच्या तोंडाला बूच लागते, तसेच ते पाकिस्तानातील हिंदूंविरोधातील शेकडो कृत्ये समोर आल्यावरही मूग गिळून गप्प बसणेच शहाणपणाचे समजतात. अर्थात त्यामागे भारतातलाच नव्हे, तर जगभरचा हिंदू प्रताडित व्हावा आणि त्याचे वाटोळे व्हावे, हा अविचार पाळणाऱ्यांचा कसला ना कसला स्वार्थ असतोच. तो कधी स्वयंसेवी संस्थांच्या रूपाने, कधी परदेशी देणग्यांच्या रूपाने तर कधी ऐशोआरामी जीवनशैलीच्या रूपाने पुरा केला जातो.