'वंचित'चा महाराष्ट्र बंद मागे

मुंबई : नागरिकत्व दुरुस्ती कायदा आणि एनआरसीविरोधात पुकारलेला महाराष्ट्र बंद अखेर वंचित बहुजन आघाडीने मागे घेतला आहे. वंचितचे प्रमुख प्रकाश आंबेडकर यांनी ही घोषणा केली. आम्ही कोणावरही हिंसाचारासाठी दबाव टाकलेला नव्हाता, असा दावा जरी त्यांनी केला असला तरीही बंदचे पडसाद राज्यभर उमटले. अनेक ठिकाणी वाहनांची जाळपोळ करण्यात आली, तसेच दुकानांची तोडफोडही करण्यात आली. या बंदला संमिश्र प्रतिसाद मिळाला.

वंचितने पुकारलेल्या महाराष्ट्र बंदला राज्यात संमिश्र प्रतिसाद मिळत आहे. मुंबईत जनजीवन सुरळीत असून काही भागात तणावपूर्ण शांतता आहे. अकोला, औरंगाबाद, सोलापूर, हिंगोली याठिकाणी बंदला उस्फूर्त प्रतिसाद मिळाला आहे. इंदापूरमध्येही कडकडीत बंद पाळण्यात आला आहे. बंदला कुठेही गालबोट लागू नये याकरिता महाराष्ट्र पोलिसांकडून चोख बंदोबस्त करण्यात आला आहे.