‘अॅमेझॉन’ देणार १० लाख भारतीयांना रोजगार!

अॅमेझॉन भारतात करणार १ अब्ज अमेरिकी डॉलर्सची गुंतवणूक

नवी दिल्ली : अॅमेझॉनने येत्या पाच वर्षांच्या कालावधीत भारतात १ अब्ज अमेरिकी डॉलरची गुंतवणूक करण्याची घोषणा केल्यानंतर रोजगारनिर्मितीबाबत आता महत्त्वाची घोषणा केली आहे. भारतात येत्या ५ वर्षांत अॅमेझॉनतर्फे १० लाख नवे रोजगार निर्माण केले जातील, असे अॅमेझॉनचे सीईओ जेफ बेझोस यांनी त्यांच्या भारत दौऱ्यादरम्यान सांगितले. अॅमेझॉनकडून तंत्रज्ञान, पायाभूत सुविधा व दळणवळण क्षेत्रात होणाऱ्या गुंतवणुकीच्या माध्यमातून हे रोजगार उपलब्ध होतील, असे ते म्हणाले. अॅमेझॉनने गेल्या ६ वर्षांच्या कालावधीत भारतात ७ लाख रोजगार निर्माण केले आहेत.

आमच्या कंपनीच्या व्यवसायात येथील कर्मचाऱ्यांचे अमूल्य योगदान आहे. आमच्याशी जोडल्या गेलेल्या लहान व्यावसायिकांनी असामान्य सृजन दाखवले आहे. तसेच, आमच्या मंचावरून विकल्या जाणाऱ्या उत्पादनांना येथील ग्राहकांनी भरभरून प्रतिसाद दिल्यामुळे येथे भविष्यात व्यवसायविस्तार करण्याचे उद्दिष्ट कंपनीने आखले असून त्यातून स्थानिक तरुणांना रोजगार व देशी व्यावसायिकांना बाजार उपलब्ध होईल, असे बेझोस म्हणाले.