पर्यावरणासाठी एसटीची ‘शिवाई’

मुंबई : इंधनापासून होणारे वाढते प्रदूषण रोखण्यासाठी विद्युत उर्जेवर चालणार्‍या गाड्यांच्या वापरावर भर दिला जात असतानाच पर्यावरणपूरक गाड्या चालविण्याकडे एसटी महामंडळानेही एक पाऊल पुढे टाकले आहे. इलेक्ट्रिकवर चालणारी पहिली बस मुंबईत एसटी महामंडळाच्या ताफ्यात दाखल झाली असून ’शिवाई’ असे या बसचे नामकरण करण्यात आले आहे. ही बस दादर ते पुणे दरम्यान धावणार आहे. विजेवर चालणार्‍या या पर्यावरणपूरक बसमुळे एसटी महामंडळाच्या खर्चात बचत होणार आहे. शिवसेना पक्षप्रमुख उद्धव ठाकरे यांच्या हस्ते गुरुवारी या बसचे लोकार्पण करण्यात आले.

इंधन दरवाढीमुळे होणारा खर्च टाळण्यासाठी विजेवर चालणारी बस घेण्याचा निर्णय एसटी महामंडळाचे अध्यक्ष आणि परिवहन मंत्री दिवाकर रावते यांनी घेतला होता. त्यानुसार ही बस घेण्यात आली आहे. विजेवर चालणार्‍या अशा एकूण १५० बसेस खरेदी करण्यात येणार असून त्याची निविदा प्रक्रियाही पूर्ण झाली आहे. या बसची आसन क्षमता ४४ इतकी आहे. ही बस वातानुकूलित असून चार्ज केल्यानंतर ३०० किमीपर्यंतचा पल्ला गाठण्याची क्षमता या बसची आहे. शिवाय बस चार्ज होण्यासाठी १ ते ५ तासांचा कालावधी लागणार आहे. या बसचा खर्च शिवशाही बसपेक्षा अधिक आणि शिवनेरीपेक्षा कमी असणार असून या इलेक्ट्रिक बसमुळे प्रदूषणात घट होणार आहे.

एसटी कार्यालयाचेही भूमिपूजन

मुंबई सेंट्रल येथील एसटी महामंडळाच्या मध्यवर्ती कार्यालयाच्या बहुमजली इमारतीचे निर्माण आणि आगार व बसस्थानकाचा पुनर्विकास तसेच विद्याविहार, मुंबई येथे रा. प. कर्मचार्‍यांसाठी सेवा निवासस्थान, विभागीय कार्यालय व विभागीय कार्यशाळा यांचा पुनर्विकास आणि शाळा संकुलाची निर्मिती या कामांचे भूमिपूजन शिवसेना पक्षप्रमुख उद्धव ठाकरे यांच्या हस्ते यावेळी करण्यात आले.