'नागला' वनपरिक्षेत्रातील अवैध दारुभट्टीवर वनविभागाचा छापा

बोरिवलीच्या 'संजय गांधी राष्ट्रीय उद्याना'च्या अखत्यारीत वसईतील 'नागला' वनपरिक्षेत्राचा समावेश आहे. या परिक्षेत्रातील ईंदाळीचा नाला परिसरात एक वनवासी इसमाने अवैध्यरित्या प्रवेश करुन दारुभट्टी लावल्याची माहिती वनाधिकाऱ्यांना मिळाली होती. जंगलांमध्ये अशा पद्धतीने दारुभट्टी लावून गावठी दारू तयार करण्याचे काम केले जाते. मिळालेल्या माहितीनुसार वनाधिकाऱ्यांनी शुक्रवारी सकाळी ८.३० वाजता ईंदळीचा नाला परिसरात धाड मारली. या ठिकाणी आरोपी गावठी दारू एका पिशवीत भरुन त्याची वाहतूक करत असल्याचे दिसून आले. वनाधिकाऱ्यांनी चपळाईने त्याच्यावर झडप घालून त्याला ताब्यात घेतले. त्याच्याकडून अंदाजे २० लीटर गावठी दारू हस्तगत करण्यात आली आहे. या आरोपीचे नाव कमलाकर अनंत माळी (४१) असून तो वसईतील खोलांडे परिसरातील वनवासी आहे.