राज्यातील शासकीय इमारतींच्या परिसरात उभारणार १०० ई-चार्जिंग स्टेशन
@@NEWS_SUBHEADLINE_BLOCK@@
मुंबई : मंत्रालयासह राज्यातील इतर शासकीय इमारतींच्या परिसरात ई. ई. एस एल कंपनी शंभर ई-चार्जिंग स्टेशन उभारणार असून यासाठी राज्यात किमान दीडशे जागा उपलब्ध करून देणार असल्याचे, सार्वजनिक बांधकाम राज्यमंत्री डॉ. परिणय फुके यांनी सांगितले.
केंद्र शासनाच्या धोरणानुसार सार्वजनिक बांधकाम विभागांच्या कार्यालयातील मोकळ्या जागेचा वापर इलेक्ट्रिक वाहनांच्या चार्जिंग स्टेशनसाठी व्हावा. यासाठी मुंबई, पुणे, नाशिक येथील सार्वजनिक बांधकाम विभागाच्या अखत्यारित असलेल्या जागा उपलब्ध करून देण्याबाबत आज सार्वजनिक बांधकाम राज्यमंत्री डॉ.परिणय फुके यांनी बैठक घेतली.
ई- चार्जिंग स्टेशन सर्व पार्किंग होणाऱ्या जागेत झाल्यास याचा नफा अधिक होऊ शकतो, सर्व शॉपिंग मॉल्समध्ये याची सक्ती केल्यास पार्किंग झालेल्या गाड्या चार्ज होऊन त्यातील नफा देखील मिळवता येईल. इलेक्ट्रिक वाहन संकल्पनेला चालना दिल्यास येणाऱ्या काळात पर्यावरणाचा समतोल राखणे शक्य होणार असल्याचे त्यांनी सांगितले.
प्रतियुनिट चार्जिंग सहा ते सात रुपये सामान्य ग्राहकांना परवडणारा असणार आहे अशी माहिती उपस्थित अधिकाऱ्यांनी दिली. या बैठकीस सार्वजनिक बांधकाम विभागाचे सचिव अ.अ. सगणे, वाशीम जिल्ह्याचे अधीक्षक अभियंता रणजित हांडे आणि सार्वजनिक बांधकाम विभागाचे इतर अधिकारी उपस्थित होते.