२६ जुलैला 'उरी' चित्रपट मोफत दाखवण्याचे राज्य सरकारचे आदेश

मुंबई : १ जानेवारी रोजी प्रदर्शित झालेला विकी कौशल याचा 'उरी द सर्जिकल स्ट्राईक' हा सिनेमा पुन्हा एकदा २६ जुलै ला कारगिल विजय दिनाच्या निमित्ताने प्रदर्शित करण्यात येणार आहे. परंतु हा चित्रपट संपूर्ण देशात नव्हे तर महाराष्ट्रातील ४५० थिएटर मध्ये प्रदर्शित करण्यात येणार आहे. या चित्रपटाच्या निर्मात्यांनी याबाबत माहिती दिली. महाराष्ट्रात या चित्रपटाचा एक शो म्हणजेच २६ जुलै रोजी मोफत दाखवण्याचे आदेश माजी सैनिक कल्याणमंत्री संभाजी पाटील निलंगेकर यांनी सर्व जिल्ह्याधिकार्यांना दिले. २६ जुलै रोजी सकाळी दहा वाजता हा चित्रपट राज्यातील ४५० चित्रपटगृहात मोफत दाखवण्यात येणार आहे. उरी मोफत दाखवण्याबाबतचे आवाहन राज्यातील सर्व चित्रपटाचे वितरक, सिनेमागृहाचे मालक व चित्रपट संघटनांना करण्यात आले आहे.