नवी दिल्ली : केंद्रीय मंत्री अमित शाह सोमवारी लोकसभेत नागरिकत्व दुरुस्ती विधेयक सादर करतील. या विधेयकानुसार पाकिस्तान, बांगलादेश व अफगाणिस्तान या देशांतील धार्मिक छळ किंवा अत्याचारग्रस्त गैर मुस्लिम निर्वासितांना भारतीय नागरिकत्व देण्याची तरतूद आहे. सोमवारी लोकसभेत होणाऱ्या कामकाजाच्या यादीनुसार गृहमंत्री अमित शाह दुपारी हे विधेयक लोकसभेत मांडतील.
नागरिकत्व (दुरुस्ती) विधेयक, २०१९ (सीएबी) नुसार पाकिस्तान, बांगलादेश आणि अफगाणिस्तानात धार्मिक छळामुळे ३१ डिसेंबर २०१४ पर्यंत भारतात आलेल्या हिंदू, शीख, बौद्ध, जैन, पारशी आणि ख्रिश्चन समाजातील लोकांना बेकायदेशीर निर्वासित मानले जाणार नाही तर त्याऐवजी त्यांना भारतीय नागरिकत्व दिले जाईल.