केरळ पूरग्रस्तांसाठी एसटी कर्मचाऱ्यांची मदत
Total Views |
एसटी महामंडळ आणि कर्मचाऱ्यांनी केली १० कोटींची मदत
मुंबई : केरळ पूरग्रस्तांच्या मदतीसाठी आता एसटी कर्मचारीही सरसावले आहेत. एसटी महामंडळ आणि कर्मचाऱ्यांनी १० कोटींची मदत दिली आहे. परिवहनमंत्री आणि एसटी महामंडळाचे अध्यक्ष दिवाकर रावते यांच्यासह एसटी कर्मचाऱ्यांनी मुख्यमंत्री देवेंद्र फडणवीस यांची भेट घेऊन त्यांच्याकडे हा धनादेश सुपूर्द केलो.
केरळमध्ये पुराने हाहाकार माजवल्याने महाराष्ट्रासह देशभरातून केरळसाठी मदतीचा ओघ सुरू झाला आहे. एसटी कर्मचारी आणि महामंडळानेही केरळ पूरग्रस्तांना मदत देण्यासाठी कंबर कसली. सर्व कामगार संघटनांनी कामगारांचे एक दिवसाचे वेतन केरळ पूरग्रस्तांसाठी देण्याची घोषणा केली, मात्र परिवहनमंत्री दिवाकर रावते यांनी कामगारांचा केवळ अर्ध्या दिवसाचा पगार कापण्याचा आणि तेवढीच रक्कम एसटी प्रशासनामार्फत देण्याची सूचना केली. त्यानुसार एकूण १० कोटी रुपयांची रक्कम जमा करण्यात आली, गुरुवारी दुपारी मुख्यमंत्र्यांना त्याचा धनादेश देण्यात आला.
यावेळी रावते यांच्यासह महामंडळाचे उपाध्यक्ष व व्यवस्थापकीय संचालक रणजीत सिंह देओल, एसटी कर्मचारी रामदास पवार, योगेश मुसळे, नितीन गदमळे, आप्पा वरपे, कमलाकर साळवे, संदीप कातकर यांच्यासह विविध कामगार संघटनांचे पदाधिकारी उपस्थित होते.
एसटी कर्मचाऱ्यांनी तसेच एसटी महामंडळाने आपत्तीग्रस्तांना मदत करण्याची नेहमीच भूमिका घेतली आहे. यापूर्वीही महाराष्ट्रातील दुष्काळग्रस्त शेतकऱ्यांना मदतीसाठी एसटी कर्मचारी आणि महामंडळ पुढे सरसावले होते. आता केरळ राज्यावर मोठे संकट कोसळले असून तेथील नागरिकांना मदतीसाठी एसटी कर्मचाऱ्यांनी स्वतःहून तयारी दर्शविली. कर्मचाऱ्यांची ही भूमिका मानवतेची तसेच इतर सर्वांसाठी आदर्शवत अशी आहे. कर्मचाऱ्यांच्या मदतीत एसटी महामंडळामार्फतही तेवढेच योगदान देऊन हा धनादेश मुख्यमंत्र्यांकडे सुपूर्द करण्यात आला, असे रावते यांनी यावेळी सांगितले.
माहितीच्या महापुरात रोजच्या रोज नेमका मजकूर मिळविण्यासाठी लाईक करा... facebook.com/MahaMTB/
