धुळे येथे पोलिस अधिकाऱ्याची आत्महत्या

धुळे : स्थानिक गुन्हा अन्वेषण विभागाचे वरीष्ठ पोलीस निरिक्षक रमेशसिंह परदेशी यांनी मध्यरात्रीच्या सुमारास गोळी झाडून आत्महत्या केल्यामुळे खळबळ उडाली आहे.

 

शिस्तप्रिय व मनमिळावू म्हणून ओळख असलेल्या रमेशसिंह परदेशी यांनी पत्नी घरात असतानाच पोलीस क्वार्टरमध्येच बुधवारी रात्री ११.३० ते १२ वाजेच्या सुमारास स्वतःच्या सर्व्हिस रिव्हॉल्व्हरमधून गोळी झाडली. या घटनेनंतर जिल्हा पोलीस अधीक्षक, अपर पोलीस अधीक्षक यांच्यासह अन्य अधिकार्‍यांनी घटनास्थळी धाव घेतली. परदेशी यांनी कुठल्या कारणावरून आत्महत्या केली? हे अद्याप स्पष्ट झालेले नाही. त्यांच्या पश्चात पत्नी, दोन मुले, सुना व नातवंडे असा परीवार आहे.

 

स्थानिक गुन्हे शाखेचा पदभार घेताना परदेशी यांनी अनेक गुन्हे उघडकीस आणले होते. मे महिन्यात ते सेवानिवृत्त होणार होते मात्र त्यापूर्वीच अप्रिय घटना घडली. पोलीस दलाकडून नेमक्या कारणांचा शोध घेतला जात आहे.