एसडी-सीड्मार्फत शिष्यवृत्ती वितरण सोहळा रविवारी

दरवर्षाप्रमाणे यंदाही एसडी-सीड्मार्फत (सुरेशदादा शैक्षणिक व उद्योजक विकास योजना) उच्च शिक्षणासाठी दिल्या जाणार्‍या श्रीमती प्रेमाबाई भिकमचंदजी जैन उच्चशिक्षण शिष्यवृत्ती वितरण सोहळा रविवारी छत्रपती संभाजीराजे नाट्य मंदिरात होणार आहे, अशी माहिती गव्हर्निंग बोर्ड चेअरमन डॉ. प्रसन्नकुमार रेदासनी यांनी दिली.

 

सुरेशदादा जैन यांच्या निवासस्थानी शिवाजी नगर, 7 येथे गुरुवारी पत्रपरिषदेचे आयोजन करण्यात आले होते. त्यावेळी ते बोलत होते. यावेळी गव्हर्निंग बोर्ड सदस्य राजेश यावलकर आदी उपस्थित होेते.

 

जिल्ह्यातील गरजू, गुणवंत विद्यार्थ्यांनी त्यांचे शिक्षण निर्विघ्नपणे पूर्ण करावे, स्वतःला सक्षम बनवावे या उद्देशाने माजी मंत्री सुरेशदादा जैन यांच्या मार्गदर्शनाखाली जून 2008 मध्ये एसडी-सीड्मार्फत उच्चशिक्षण शिष्यवृत्ती योजना सुरू करण्यात आली.

 

आजपर्यंत हे भागीरथी व्रत थांबलेले नाही. या वर्षीचा शिष्यवृत्ती वितरण सोहळा रविवार, 18 रोजी सकाळी 10 वाजता छत्रपती संभाजीराजे नाट्य मंदिर, जळगाव येथे होणार आहे.

 

यावेळी उद्योजक भारत विकास ग्रुप (बी.व्ही.जी.)चे संस्थापक तथा अध्यक्ष हणमंतराव गायकवाड, ज्येष्ठ पत्रकार विजय दर्डा हे उपस्थित राहणार आहे. त्यानंतर विद्यार्थ्यांशी संवाद साधणार आहे, असे गव्हर्निंग बोर्ड सदस्य राजेश यावलकर यांनी सांगितले.

 

दहा वर्षात 13 हजार विद्यार्थ्यांना शिष्यवृत्तीपोटी सुमारे 5 कोटी रुपये देण्यात आले आहेत. यामुळे 3,100 विद्यार्थ्यांना त्यांचे उच्च शिक्षण पूर्ण करणे शक्य झाले आहे.

 

यात इंजिनिअरिंग, सायन्स, कॉमर्स, मेडिकल अ‍ॅण्ड फार्मसी, कॉम्युटर अ‍ॅण्ड टेक्नॉलॉजी, आर्टस्, एज्युकेशन, आयटीआय, मॅनेजमेंट, अ‍ॅग्रीकल्चर आदी विद्याशाखांचा समावेश आहे. लाभार्थी विद्यार्थ्यांची सर्वाधिक संख्या इंजिनिअरिंग शाखेत राहिली आहे.

 

30 हजार विद्यार्थ्यांना 220 कार्यशाळांच्या माध्यमातून 14 विविध विषयांवर प्रशिक्षित करण्याचे काम एसडी-सीड्ने केेले आहे. विद्यार्थी हितासाठी 46 बँका (शैक्षणिक कर्ज योजना), 3 वसतिगृहे, 3 ग्रंथालये, 49 कोचिंग क्लासेस, 27 पुस्तके दुकाने आणि 1 नोकरी सहायता केंद्र आदी 129 संस्थांसोबत सहकार्य करार करण्यात आले असून, अनेक विद्यार्थी आज याचा लाभ घेत आहेत. विद्यार्थी दत्तक योजनेत देणगीदार स्वतःच्या आवडीनुसार विद्यार्थी दत्तक घेऊ शकतो.

 

याची सविस्तर माहिती www.sdseed.in संकेतस्थळावर किंवा 7 - शिवाजीनगर, जळगाव येथे उपलब्ध आहे.