जनतेच्या पैशांची लूट करणारे नौटंकी लालूप्रसाद !

लालूप्रसाद यांचा मुलगा तेजस्वी याने, भाजप आणि नितीशकुमार यांनी आपल्या वडिलांविरुद्ध कटकारस्थान केल्याचा आरोप केला. न्यायालयाच्या निर्णयाविरुद्ध झारखंड उच्च न्यायालयात दाद मागण्यात येईल, असेही त्याने सांगितले. आपल्या वडिलांना असलेले जनसमर्थन आणि जातीयवादी शक्तींना अटकाव करण्याचे त्यांनी दाखविलेले धाडस यामुळे त्यांच्या विरोधकांना असुरक्षित वाटत आहे, असेही तो म्हणतो. मात्र, पशुधनाच्या चारापाणी आणि औषधोपचार यावर खर्च केल्याचे दाखवून सरकारी तिजोरीवर ९५० कोटींचा डल्ला मारणारे लालूप्रसाद आणि त्यांचे साथीदार हे तुरुंगात खितपत पडण्याच्याच लायकीचे आहेत. आतापर्यंत ३१७ दिवस तुरुंगात वास्तव्य केलेल्या लालूप्रसाद यांनी खरे म्हणजे राजकारण संन्यास घेऊन तोंड काळे करायला पाहिजे. पण, सत्तेची चटक अनुभवलेले लालूप्रसाद आणि त्यांच्या कुटुंबातील मंडळी तसे वागण्याची सुतराम शक्यता नाही. पहिल्या खटल्यातील निकालाने लालूप्रसाद यांना ११ वर्षे निवडणूक लढविण्यास बंदी घातली आहे. त्याबाबतची याचिका वरिष्ठ न्यायालयाने फेटाळून लावल्यास लालूंना सक्तीचा राजकारण संन्यास घेऊन तोंड काळे करावे लागणार आहे. उर्वरित खटल्यांचे निकाल असेच लागत गेल्यास, ‘लालूजी, आप दिखते है भोलू, लेकीन आप तो निकले बडे चालू,’ यावर शिक्कामोर्तब होईल!